ઈરાને દરિયામાંથી પસાર થતા ઇન્ટરનેટ કેબલ્સને નિશાન બનાવીને ગલ્ફમાં ઇન્ટરનેટ બંધ કરવાની ધમકી આપી

હોર્મુઝ સ્ટ્રેટમાંથી પસાર થતા મુખ્ય સમુદ્રી ઇન્ટરનેટ કેબલ્સ વૈશ્વિક ડેટા ટ્રાફિક માટે એક મહત્ત્વપૂર્ણ કૉરિડોર છે

હોર્મુઝની ખાડી

ઈરાનના ઇસ્લામિક રેવૉલ્યુશનરી ગાર્ડ કૉર્ઝ (IRGC)એ એક નવી ચેતવણી જાહેર કરી છે કે પર્શિયન ગલ્ફમાં મહત્ત્વપૂર્ણ દરિયાઈ કેબલ્સને નિશાન બનાવી શકાય છે. તસનીમ ન્યુઝ એજન્સી દ્વારા પ્રકાશિત એક અહેવાલમાં IRGC સાથે જોડાયેલા મીડિયાએ આ ક્ષેત્રમાં ડિજિટલ ઇન્ફ્રાસ્ટ્રક્ચરના વ્યૂહાત્મક મહત્ત્વ અને નબળાઈની રૂપરેખા આપી છે. ઈરાને હોર્મુઝ સ્ટ્રેટમાંથી પસાર થતા મુખ્ય દરિયાઈ ઇન્ટરનેટ કેબલ્સની જાણકારી મેળવી લીધી છે અને એને નિશાન બનાવવાની તૈયારી કરી છે. પરંપરાગત લશ્કરી કાર્યવાહીથી આગળ વધીને આ નવી ધમકીથી ગલ્ફ દેશોમાં ચિંતા વધી છે.

હોર્મુઝ સ્ટ્રેટમાંથી પસાર થતા મુખ્ય સમુદ્રી ઇન્ટરનેટ કેબલ્સ વૈશ્વિક ડેટા ટ્રાફિક માટે એક મહત્ત્વપૂર્ણ કૉરિડોર છે. યુનાઇટેડ આરબ એમિરેટ્સ (UAE), કતર, બાહરિન, કુવૈત અને સાઉદી અરેબિયા સહિતના ગલ્ફ દેશો કનેક્ટિવિટી માટે આ દરિયાઈ કેબલ સિસ્ટમ્સ પર ખૂબ આધાર રાખે છે. આ કેબલ, લૅન્ડિંગ સ્ટેશન અને ક્લાઉડ હબને સંભવિત દબાણ બિંદુઓ તરીકે ફ્રેમ કરવામાં આવ્યાં છે. UAE અને બાહરિન જેવા દેશોમાં ડેટા સેન્ટરો માટે આ કેબલ્સ ઉપયોગી છે અને એમાં કોઈ પણ પ્રકારનો વિક્ષેપ વ્યાપક આર્થિક અને સંદેશવ્યવહાર પર અસર કરી શકે છે.