26 March, 2026 07:28 AM IST | Washington | Gujarati Mid-day Correspondent
મેટા કંપનીનો લોગો
ફેસબુક, ઇન્સ્ટાગ્રામ અને વૉટ્સઍપ જેવાં સોશ્યલ મીડિયા પ્લૅટફૉર્મ્સની માલિકી ધરાવતી માર્ક ઝકરબર્ગની કંપની મેટાએ બાળકોની સલામતી અને માનસિક સ્વાસ્થ્ય માટેનાં જોખમો છુપાવ્યાં હતાં અને નફો કરવા માટે નિયમોનું ઉલ્લંઘન કર્યું હોવાથી લાંબી ટ્રાયલ પછી કોર્ટે કંપનીને દોષી ઠેરવીને ૩૭૫ મિલ્યન ડૉલર (આશરે ૩૧૦૦ કરોડ રૂપિયા)નો દંડ ફટકાર્યો હતો.
ન્યુ મેક્સિકોની એક જ્યુરીએ મંગળવારે જણાવ્યું હતું કે મેટાએ જાણીજોઈને બાળકોના માનસિક સ્વાસ્થ્યને નુકસાન પહોંચાડ્યું છે અને એના સોશ્યલ મીડિયા પ્લૅટફૉર્મ પર બાળ જાતીય શોષણ વિશે જે જાણકારી હતી એ છુપાવી હતી. આ ચુકાદો ટેક કંપનીઓ સામે બદલાતી લહેર અને સરકારની કડક કાર્યવાહી કરવાની તૈયારીનો સંકેત આપે છે.
આ સીમાચિહ્નરૂપ નિર્ણય લગભગ ૭ અઠવાડિયાંની ટ્રાયલ પછી આવ્યો છે અને કૅલિફૉર્નિયાની ફેડરલ કોર્ટમાં જ્યુરીના સભ્યોએ એક અઠવાડિયાથી વધુ સમયથી ચર્ચા કરી હતી કે શું મેટા અને યુટ્યુબ સમાન કેસમાં જવાબદાર હોવાં જોઈએ કે નહીં.
ન્યુ મેક્સિકોની જ્યુરીએ રાજ્યના વકીલોનો પક્ષ લીધો, જેમણે દલીલ કરી હતી કે ઇન્સ્ટાગ્રામ, ફેસબુક અને વૉટ્સઍપની માલિકી ધરાવતી મેટાએ સલામતી કરતાં નફાને પ્રાથમિકતા આપી હતી અને રાજ્યના કાયદાનું ઉલ્લંઘન કર્યું હતું. જ્યુરી એવા આરોપો સાથે સંમત થઈ હતી કે મેટાએ ખોટાં અથવા ગેરમાર્ગે દોરતાં નિવેદનો આપ્યાં હતાં.
ન્યાયાધીશોએ શોધી કાઢ્યું હતું કે હજારો ઉલ્લંઘનો થયાં છે. તેમણે ૩૭૫ મિલ્યન ડૉલરનો દંડ ફટકાર્યો હતો. આ રકમ ફરિયાદીઓ જે માગી રહ્યા હતા એના પાંચમા ભાગ જેટલી છે. જોકે મેટાનું મૂલ્ય લગભગ ૧.૫ ટ્રિલ્યન ડૉલર છે. ચુકાદા પછીના શરૂઆતના કલાકો પછીના ટ્રેડિંગમાં કંપનીનો શૅર પાંચ ટકા વધ્યો હતો, જે સંકેત છે કે શૅરધારકોએ આ સમાચારને અવગણી દીધા હતા.
