09 July, 2026 10:12 AM IST | America | Gujarati Mid-day Correspondent
લૉરેન્સ બિશ્નોઈ
અમેરિકાની અગ્રણી તપાસ-એજન્સી ફેડરલ બ્યુરો ઑફ ઇન્વેસ્ટિગેશન (FBI)એ ગૅન્ગસ્ટર લૉરેન્સ બિશ્નોઈના આંતરરાષ્ટ્રીય ક્રાઇમ નેટવર્કને જડમૂળમાંથી ઉખાડી ફેંકવા માટે અત્યાર સુધીનું સૌથી મોટું સંયુક્ત સર્ચ-ઑપરેશન શરૂ કર્યું હતું. ‘ઑપરેશન હાર્ડ બૉલ’ નામ હેઠળ અમેરિકા, કૅનેડા અને યુરોપના વિવિધ દેશોમાં બિશ્નોઈ ગૅન્ગનાં પચાસથી વધુ ગુપ્ત સ્થળો પર એકસાથે દરોડા પાડવામાં આવ્યા હતા. FBIના એજન્ટો દ્વારા સ્થાનિક પોલીસ વિભાગો સાથે મળીને ચલાવવામાં આવેલા આ દરોડાની કાર્યવાહી દરમ્યાન ગૅન્ગના આશરે ૨૦ જેટલા સભ્યોની ધરપકડ પણ કરવામાં આવી હતી.
અબજોનાં ડ્રગ્સ અને હથિયારો રિકવર : લૉસ ઍન્જલસ સહિત કૅલિફૉર્નિયાના અનેક વિસ્તારોમાં પાડવામાં આવેલા દરોડા દરમ્યાન ભારે માત્રામાં હેરોઇન-કોકેન જેવાં ઘાતક ડ્રગ્સ, અનેક અત્યાધુનિક હથિયારો અને હજારો ડૉલરની રોકડ રકમ જપ્ત કરવામાં આવ્યાં હતાં.
જેલમાંથી ઑપરેટ થતી સિન્ડિકેટ : અમેરિકી તપાસ-એજન્સીઓના જણાવ્યા અનુસાર લૉરેન્સ બિશ્નોઈ ભારતીય જેલમાં બંધ હોવા છતાં સ્મગલ કરેલા મોબાઇલ ફોન દ્વારા વિદેશમાં રહેલા પોતાના ગૅન્ગસ્ટરને સીધા આદેશો આપીને આ વૈશ્વિક નેટવર્ક નિયંત્રિત કરતો હતો.
સાથી ગૅન્ગ્સનાં કનેક્શન પણ તોડી નાખ્યાં : આ આંતરરાષ્ટ્રીય કાર્યવાહીમાં માત્ર બિશ્નોઈ ગૅન્ગ જ નહીં; તેના ખાસ સાથીદારો ગોલ્ડી બ્રાર, જગ્ગુ ભગવાનપુરિયા અને રવીન્દર સિંહ ઢાંડાના કમર્શિયલ ટ્રકિંગ રૂટ્સ દ્વારા થતા ડ્રગ્સના ટ્રાફિકિંગ નેટવર્કને પણ સંપૂર્ણપણે ધ્વસ્ત કરી દેવામાં આવ્યું છે.
આતંકી સંગઠન તરીકે પ્રવૃત્તિઓ : આ આંતરરાષ્ટ્રીય ગૅન્ગ વિદેશમાં રહેતા ભારતીય સમુદાય પાસેથી કરોડો રૂપિયાની ખંડણી વસૂલવા અને હાઈ-પ્રોફાઇલ હત્યાઓ કરવાના ગુનામાં સામેલ હોવાથી ગયા વર્ષે કૅનેડા સરકારે એને આતંકી સંગઠન જાહેર કર્યું હતું. અમેરિકી વકીલોએ પણ સ્પષ્ટ કર્યું છે કે પોતાની ધરતી પર આવી ગૅન્ગ્સ સામે ઝીરો ટૉલરન્સ નીતિ અપનાવાશે.
