દિલ્હીથી મુંબઈ આવતી ગરીબ રથ ટ્રેનમાં ૩ ઑન-ડ્યુટી ટિકિટ-કલેક્ટરની મારપીટ

દારૂડિયા પૅસેન્જરોએ દોડતી ટ્રેનમાં ધમાલ કરી ત્યાર બાદ રેલવે યુનિયન થયું આક્રમક

પ્રતીકાત્મક તસવીર

દિલ્હીથી મુંબઈ આવી રહેલી ગરીબ રથ એક્સપ્રેસમાં ૩ ઑન ડ્યુટી ટિકિટ કલેક્ટર (TC)ની મારપીટ કરવામાં આવી હોવાની ઘટના સામે આવી છે. ટ્રેનમાં પ્રવાસ કરી રહેલા દારૂનો નશો કરીને બેસેલા પૅસેન્જરોએ TCની મારપીટ કરી હતી. આ ઘટના બાદ વેસ્ટર્ન રેલવે મઝદૂર સંઘે ઘટનાની તપાસનો આદેશ આપવામાં આવે અને કાર્યવાહી કરવામાં આવે એવી માગણી કરી છે. આ મામલે વડોદરા રેલવે પોલીસમાં ફરિયાદ નોંધાવવામાં આવી છે. 
આ ઘટનામાં નશામાં ધુત પ્રવાસીઓએ TC પર હુમલો કરવા ઉપરાંત તેમનાં ઇન્સ્પેક્શન મશીન અને હૅન્ડહેલ્ડ ટર્મિનલ (HHT) પણ ઝૂંટવી લીધાં હતાં. HHT મશીનથી જ TC રિયલ ટાઇમ ડેટા કલેક્શન કરે છે તથા બાર કોડ સ્કૅન અને ટિકિટ મૅનેજમેન્ટ કરવામાં કરતા હોય છે. આ ઘટનાથી રોષે ભરાયેલા યુનિયન વેસ્ટર્ન રેલવે મઝદૂર સંઘે પોલીસ ક્લોઝ્ડ સર્કિટ ટેલિવિઝન (CCTV) કૅમેરાનાં ફુટેજ ચકાસવાની તથા ટ્રેનમાં પ્રવાસ કરી રહેલા ઘટનાના સાક્ષી રહેલા અન્ય પૅસેન્જરોનાં નિવેદનો નોંધે એવી માગણી પણ કરી છે. 
આરોપી પૅસેન્જરો વિરુદ્ધ કડક કાર્યવાહી કરવામાં આવે એવી માગણી યુનિયન દ્વારા વેસ્ટર્ન રેલવેના જનરલ મૅનેજર પાસે કરવામાં આવી હતી. જે TC પર હુમલો કરવામાં આવ્યો તેમનાં નામ બસંત, અમિત અને અંકિત હોવાનું જાણવા મળ્યું હતું. દારૂબાજ પૅસેન્જરો અડધી રાત્રે કોચમાં આંટા મારીને, સીટીઓ વગાડીને મુસાફરોને પરેશાન કરતા હોવાની જાણ TCએ કન્ટ્રોલરૂમને શુક્રવારે મોડી રાત્રે ૧.૨૭ વાગ્યે કરી હતી. TCએ જ્યારે તેમને રોકવાનો પ્રયત્ન કર્યો ત્યારે તેમણે જીભાજોડી કરી હતી અને ૨.૧૫ વાગ્યા પછી TC પર હુમલો કર્યો હતો. આગળ ગોધરા સ્ટેશન પર ગાડી રોકવાની માગણી TCએ કરી હતી, પરંતુ ટ્રેન છેવટે વડોદરા સ્ટેશન રોકાઈ ત્યારે રેલવે પ્રોટેક્શન ફોર્સ (RPF)એ ટ્રેનમાં ચડીને પરિસ્થિતિ થાળે પાડી હતી. વડોદરા સ્ટેશન પર મુસાફરો વિરુદ્ધ ફરિયાદ નોંધવામાં આવી છે.