05 August, 2026 02:34 PM IST | Washington | Gujarati Mid-day Correspondent
ડોનલ્ડ ટ્રમ્પ
ટ્રમ્પ પ્રશાસને કૅનેડા, જપાન, ઇન્ડોનેશિયા સહિત પાંચ વિદેશી મિશન બંધ કરવાની યોજના વિશે અમેરિકી કૉન્ગ્રેસને જાણ કરી છે. આ નિર્ણયને અમેરિકામાં એક દુર્લભ પગલા તરીકે જોવામાં આવી રહ્યો છે કેમ કે કોઈ પણ જિયોપૉલિટિકલ ઘટના સાથે આનો સંબંધ ન હોવા છતાં અમેરિકા એનાં વિદેશી મિશનોની સંખ્યા ઘટાડી રહ્યું છે.
બંધ થનારાં મિશનોમાં ગ્રેનાડાના સેન્ટ જ્યૉર્જિસમાં આવેલી અમેરિકન એમ્બેસી તેમ જ જપાનના નગોયા, ઇન્ડોનેશિયાના મેહડન, કૅનેડાના વિનિપેગસ્થિત કૉન્સ્યુલેટ્સ અને કૅમરૂનના ડૌઆલામાં આવેલી એમ્બેસી બ્રાન્ચ ઑફિસનો સમાવેશ થાય છે.
ટ્રમ્પ સરકારનું કહેવું છે કે ખર્ચમાં ઘટાડો કરવા અને રાજદ્વારી તંત્રને વધુ મજબૂત કરવા આ પગલું લેવામાં આવી રહ્યું છે. જોકે વિપક્ષી ડેમોક્રૅટ્સ અને ભૂતપૂર્વ અધિકારીઓનું માનવું છે કે આવાં પગલાંઓથી અમેરિકાની વૈશ્વિક નેતૃત્વ કરવાની કાર્યક્ષમતામાં ઘટાડો થશે અને ચીન તથા રશિયા જેવા દેશોને પોતાનો પ્રભાવ વધારવાની તક મળશે.
અમેરિકાનાં પચીસ ડેમોક્રૅટ-શાસિત રાજ્યોએ અમેરિકન રાષ્ટ્રપતિ ડોનલ્ડ ટ્રમ્પની નવી ટૅરિફનીતિ સામે અમેરિકાની કોર્ટ ઑફ ઇન્ટરનૅશનલ ટ્રેડમાં કેસ દાખલ કર્યો છે. રાજ્યોનો આરોપ છે કે ટ્રમ્પે પોતાની કાનૂની સત્તાની મર્યાદા વટાવીને ૬૦ વેપારી ભાગીદાર દેશો પર નવી ડબલ-ડિજિટ ટૅરિફ લાદી છે.
ફરિયાદમાં દાવો કરવામાં આવ્યો છે કે સુપ્રીમ કોર્ટે અગાઉ ગેરકાયદે ઠરાવેલી ટૅરિફને ફરી અમલમાં મૂકવા ફોર્સ્ડ લેબરનું બહાનું બનાવ્યું છે. આના જવાબમાં વાઇટ હાઉસે કહ્યું છે કે આ ટૅરિફ અન્ય દેશોની અયોગ્ય વેપારનીતિઓ અને બળજબરીથી બનેલાં ઉત્પાદનોની આયાત સામે જરૂરી અને કાનૂની પગલું છે.
