09 March, 2026 12:01 PM IST | Iran | Gujarati Mid-day Correspondent
હજી પણ જાડો, કાળો ધુમાડો નીકળી રહ્યો છે અને દૂરથી જોઈ શકાય છે.
ઈરાનના ઇસ્લામિક રેવલ્યુશનરી ગાર્ડ્સ કૉર્ઝ (IRGC)એ જણાવ્યું હતું કે એનાં દળોએ કુવૈતમાં અલ-અદિરી ઍરબેઝને ડ્રોન અને મિસાઇલોથી નિશાન બનાવ્યું હતું. ફાર્સ ન્યુઝ એજન્સીના અહેવાલમાં IRGCને ટાંકીને કહેવામાં આવ્યું છે કે ઈરાનના નૌકાદળના આ હુમલાથી ઍરબેઝમાં અમેરિકન હેલિકૉપ્ટર રિપેર સેન્ટર, ફ્યુઅલ ટૅન્ક અને કમાન્ડ સેન્ટરનો નાશ થયો હતો. આ હુમલા પછી આ ઍરબેઝમાં ભયંકર આગ ફાટી નીકળી હતી અને આ બેઝમાંથી હજી પણ જાડો, કાળો ધુમાડો નીકળી રહ્યો છે અને દૂરથી જોઈ શકાય છે.
ઈરાનના પ્રેસિડન્ટ મસૂદ પેઝેશ્કિયાને શનિવારે પાડોશી દેશો પરના હુમલાઓ બદલ માફી માગીને ફરી આવા હુમલા ન કરવાની ખાતરી આપી હતી, પણ ઈરાને ગલ્ફ આરબ દેશો તરફ મિસાઇલ અને ડ્રોન છોડવાનું ચાલુ રાખ્યું છે. ગઈ કાલે ઈરાને ફરી એક વાર દુબઈ પર હુમલો કર્યો હતો જેમાં એક વ્યક્તિનું મૃત્યુ થયું હતું.
આ ઘટના વિશે દુબઈ સરકારે પુષ્ટિ કરતાં કહ્યું હતું કે અમારી ઍર ડિફેન્સ સિસ્ટમે આવનારા પ્રોજેક્ટાઇલને સફળતાપૂર્વક અટકાવ્યું હતું, પરંતુ કાટમાળ પડતાં દુબઈના મરીના વિસ્તારમાં એક ટાવરના બાહ્ય ભાગને નુકસાન થયું હતું.
અધિકારીઓએ જણાવ્યું છે કે દુબઈમાં ડ્રોન હુમલાનો કાટમાળ દુબઈ મરીનામાં ટાવર ૨૩ની નીચે પડતાં કારમાં બેસેલો ડ્રાઇવર દબાઈને મૃત્યુ પામ્યો હતો. જીવ ગુમાવનારો એશિયન નાગરિક હતો.
