15 March, 2026 01:38 PM IST | Mumbai | Gujarati Mid-day Online Correspondent
દેવોનંદન પ્રસાદ સિંહનું મૃત્યુ (તસવીર: સોશિયલ મીડિયા)
છેલ્લા 15 દિવસથી પશ્ચિમ એશિયા અને ખાડી દેશોમાં ચાલી રહેલા મોટા યુદ્ધ જેને અમેરિકાએ `ઑપરેશન ઍપિક ફ્યુરી` આપી શરૂ કર્યું હતું તે હવે વધુ ઘાતક બની રહ્યું છે. અમેરિકા અને ઇઝરાયલ સંયુક્ત રીતે ઇરાન પર હુમલા કરી રહ્યા છે, જ્યારે ઇરાન આ હુમલાઓ સામે વધુ જોરદાર હુમલાઓ કરી રહ્યું છે. આનું પરિણામ ભારતમાં પણ જોવા મળી રહ્યું છે મુંબઈના કાંદિવલીમાં રહેજા ટાવર્સ ઇટરનિટી બિલ્ડિંગના 54 વર્ષીય રહેવાસી દેવોનંદન પ્રસાદ સિંહનું ઇરાક નજીક તેલ ટૅન્કર પર થયેલા હુમલા બાદ અવસાન થયું છે. આ ઘટના મધ્ય પૂર્વમાં વધતા તણાવ દરમિયાન બની હતી, અને ભારતીય અધિકારીઓએ આ બાબત અંગે માહિતી એકત્રિત કરવાનું શરૂ કરી દીધું છે. દેવોનંદન પ્રસાદ સિંહ માર્શલ ટાપુઓના ધ્વજ હેઠળ મુસાફરી કરતા આમેરિકન માલિકીના ક્રૂડ ઓઇલ ટૅન્કર MT સેફસી વિષ્ણુ પર વધારાના મુખ્ય ઇજનેર (સુપ્રિન્ટેન્ડન્ટ) તરીકે સેવા આપી હતી. 11 માર્ચ, 2026 ના રોજ દક્ષિણ ઇરાકમાં ખોર અલ ઝુબૈર બંદર (બસરા શહેર નજીક) નજીક શિપ-ટુ-શિપ કાર્ગો લોડિંગ કામગીરી કરતી વખતે ટૅન્કર પર હુમલો થયો હતો. પ્રાથમિક અહેવાલો અનુસાર, આ હુમલો ડ્રોન અથવા વિસ્ફોટકોથી ભરેલી નાની શીપનો ઉપયોગ કરીને કરવામાં આવ્યો હતો. આ ઘટનામાં સિંહને ગંભીર ઈજાઓ થઈ હતી અને ત્યારબાદ સારવાર દરમિયાન તેમનું મોત નીપજ્યું હતું.
શિપિંગ ડિરેક્ટોરેટ જનરલ અને બગદાદમાં ભારતીય દૂતાવાસે સત્તાવાર રીતે આ માહિતી જાહેર કરી છે. હુમલા બાદ, જહાજમાં સવાર બાકીના ક્રૂ સભ્યો - જેમાં 15 ભારતીય નાગરિકો અને અન્ય રાષ્ટ્રીયતાના વ્યક્તિઓનો સમાવેશ થાય છે તેમને ઇરાકી કોસ્ટ ગાર્ડ દ્વારા સુરક્ષિત રીતે બહાર કાઢવામાં આવ્યા હતા. સિંહના પરિવારને આ ઘટનાની જાણ કરવામાં આવી છે, અને તેમના પાર્થિવ શરીરને ભારત પરત મોકલવાની પ્રક્રિયા હાલમાં ચાલી રહી છે.
દેવોનંદન પ્રસાદ સિંહ મૂળ બિહાર રાજ્યના (ખાસ કરીને ભાગલપુર પ્રદેશ, કેટલાક અહેવાલો અનુસાર) હતા. તેઓ 2019 થી તેમના પરિવાર જેમાં પત્ની અને બે બાળકોનો સમાવેશ થાય છે તેમની સાથે મુંબઈમાં રહેતા હતા. તેમનું નિવાસસ્થાન કાંદિવલી પૂર્વ વિસ્તારમાં રહેજા ટાવર્સ ઇટરનિટી સોસાયટીમાં સ્થિત હતું. તેમના અવસાનના સમાચારથી વિસ્તારમાં શોકની લાગણી પસરી ગઈ છે, અને સ્થાનિક રહેવાસીઓ અને સંબંધીઓએ તેમના પરિવારને ટેકો આપવાની ખાતરી આપી છે. આ ઘટના ઈરાન, ઇઝરાયલ અને યુનાઇટેડ સ્ટેટ્સ વચ્ચે વધતા સંઘર્ષની પૃષ્ઠભૂમિ સામે બની છે. ભારત સરકાર અને સંબંધિત મંત્રાલયો ક્રૂ સભ્યોની સલામતી સુનિશ્ચિત કરવા અને ઘટનાની તપાસ કરવા માટે પગલાં લઈ રહ્યા છે. તેમણે મૃત્યુ પહેલા પરિવારને છેલ્લો સંદેશ મોકલ્યા હોવાના પણ અહેવાલ છે.
