૧૦ વર્ષ સુધી સાચવેલી ગ્રિલ્ડ ચીઝ સૅન્ડવિચ ૨૩ લાખ રૂપિયામાં વેચાઈ

ગ્રિલિંગની પ્રોસેસ દરમ્યાન બ્રેડ પર જે બ્લૅક અને બ્રાઉન ઝાંય પડી હતી એમાં વર્જિન મૅરીની આકૃતિ ઊપસી હોય એવું જણાતું હતું

૧૦ વર્ષ સુધી બગડી ન હોય એવી વર્જિન મૅરીની આકૃતિ ધરાવતી સૅન્ડવિચનું તાજેતરમાં ઑક્શન થયું

દુનિયામાં અજાયબીઓ ક્યારે અને ક્યાં જોવા મળશે એ કોઈને ખબર નથી. અમેરિકાના ફ્લૉરિડામાં રહેતી ડાયના ડ્યુસરના જીવનમાં બે અજાયબીઓ બની હતી. એક ઘટના બની હતી ૧૦ વર્ષ પહેલાં અને એની સાથે જ સંકળાયેલી બીજી ઘટના તાજેતરમાં બની. ૧૦ વર્ષ પહેલાં તેણે પોતાના માટે એક સામાન્ય ગ્રિલ્ડ ચીઝ સૅન્ડવિચ બનાવી હતી. તમને થશે કે સૅન્ડવિચ બનાવી એમાં વળી શું નવાઈ? સાચી વાત છે. દર પળે વિશ્વમાં લાખો લોકો આવી સૅન્ડવિચ બનાવતા હશે અને ખાતા હશે. જોકે ડાયનાએ ૧૦ વર્ષ પહેલાં જે ગિલ્ડ સૅન્ડવિચ બનાવી એ ખાસ હતી. તેણે સૅન્ડવિચની એક બાઇટ ખાધી અને ત્યાં જ તેની નજર પડી કે ગ્રિલિંગની પ્રોસેસ દરમ્યાન બ્રેડ પર જે બ્લૅક અને બ્રાઉન ઝાંય પડી હતી એમાં વર્જિન મૅરીની આકૃતિ ઊપસી હોય એવું જણાતું હતું. તરત જ તેણે આ પવિત્ર આત્માના આશીર્વાદ લીધા અને આને કોઈ પવિત્ર સંકેત માનીને સૅન્ડવિચ ખાવાનું પડતું મૂકીને એને સાચવી રાખવાનું નક્કી કર્યું. આ એક અજાયબી જોઈને ઍરટાઇટ પ્લાસ્ટિક કન્ટેનરમાં ડાયનાએ સૅન્ડવિચ મૂકી દીધી. બીજી અજાયબી એ છે કે આ વાતને ૧૦ વર્ષ વીતી ગયાં હોવા છતાં એ જરાય બગડી નથી. ૧૦ વર્ષ સુધી બગડી ન હોય એવી વર્જિન મૅરીની આકૃતિ ધરાવતી સૅન્ડવિચનું તાજેતરમાં ઑક્શન થયું. એ હરાજીમાં સૅન્ડવિચ ૨૩ લાખ રૂપિયામાં વેચાઈ.