02 December, 2025 11:23 AM IST | NewZealand | Gujarati Mid-day Correspondent
જંગલી બિલાડીઓ
ન્યુ ઝીલૅન્ડમાં હવે ફેરલ કૅટ્સ તરીકે જાણીતી જંગલી બિલાડીઓને ખતમ કરવાનો નિર્ણય લેવામાં આવ્યો છે. આ પગલું દેશના અનોખા વાઇલ્ડલાઇફ વૈવિધ્યને બચાવવા માટે લેવામાં આવ્યું છે. આ બિલાડીઓ પંખીઓ, ગરોળીઓ અને ચામાચીડિયાંનો શિકાર કરી રહી છે. એમાંથી કેટલાંક પંખી અને જંતુઓ દુર્લભ અને ભાગ્યે જ જોવા મળે એવી પ્રજાતિનાં હોય છે. થોડા સમય પહેલાં બિલાડીઓએ ૧૦૦થી વધુ દુર્લભ ચામાચીડિયાંનો શિકાર કર્યો હતો. આ જંગલી બિલાડીઓ કદમાં પણ જાયન્ટ હોય છે. પૂંછડી સાથે એમનું કદ લગભગ એક મીટર જેટલું હોય છે. આ બિલાડીઓ ટૉક્સોપ્લાઝમોસિસ નામની ચેપી બીમારી પણ ફેલાવી શકે છે. એનાથી માણસો, પાળતુ પ્રાણીઓ અને ઈવન ડૉલ્ફિન જેવાં જળચર પ્રાણીઓને પણ ચેપ લાગી શકે છે. આ બધા જ મુદ્દાઓને ધ્યાનમાં રાખીને દેશમાં જ્યાં પણ ફેરલ કૅટ્સ દેખાય એને મારી નાખવામાં આવશે.