18 October, 2026 11:33 AM IST | Britain | Gujarati Mid-day Correspondent
ઊડતા પ્લેન પર ઊભાં રહ્યાં ૯૯ વર્ષનાં દાદી
બ્રિટનની ૯૯ વર્ષની હેલ્ગા ડફીએ ઊડતા પ્લેનની પાંખો પર ઊભા થઈને વર્લ્ડ રેકૉર્ડ બનાવ્યો છે. આ સ્ટન્ટને વિન્ગ-વૉકિંગ કહેવાય છે. એમાં વ્યક્તિ સેફ્ટી-બેલ્ટ પહેરીને પ્લેનની પાંખ પર ઊભી રહી જાય છે. હેલ્ગાબહેનને ૯૭ વર્ષનાં બેટી બ્રોમેઝ નામનાં દાદીએ કરેલા સ્ટન્ટ પરથી આવું કરવાનો આઇડિયા મળ્યો હતો. બેટીના સ્ટન્ટનો વિડિયો જોઈને તેમણે કહેલું કે જો બેટી કરી શકે તો હું કેમ નહીં? હેલ્ગા બ્રિટનના વિલ્ટશરમાં એક કૅર હોમમાં રહે છે. તેમણે નક્કી કરેલું કે ૨૩ સપ્ટેમ્બરે ૯૯મી વર્ષગાંઠ પર તેઓ આ સ્ટન્ટ કરશે. જોકે એ દિવસે હવામાન ખરાબ હોવાથી સ્ટન્ટ કરવાનું ટાળવું પડ્યું. તાજેતરમાં તેમણે ઇંગ્લૅન્ડના ગ્લૅસ્ટરશરના રેડકોમ્બ ઍરફીલ્ડ પર આ સ્ટન્ટ કર્યો. ૯૯ વર્ષની વયે પણ હેલ્ગાની હેલ્થ ઘણી સારી છે. આ સ્ટન્ટ કરીને તેમણે લગભગ દોઢ લાખ રૂપિયાનું ભંડોળ પણ એકત્ર કર્યું હતું. આ ફન્ડ તેમણે ઍર ઍમ્બ્યુલન્સ સેવા માટે ડોનેટ કર્યું હતું. હવે બેટીબહેને ૯૭ વર્ષે કરેલો રેકૉર્ડ તૂટી ગયો છે અને હેલ્ગાના નામે ૯૯ વર્ષે એટલે કે સૌથી મોટી વયે વિન્ગ-વૉક કરવાનો વર્લ્ડ રેકૉર્ડનો ખિતાબ મળ્યો છે.
