01 October, 2026 02:36 PM IST | Bihar | Gujarati Mid-day Correspondent
કાચબો
બિહારના ગોપાલગંજમાં એક અનોખો કાચબો મળી આવ્યો છે. એની પીઠ પરના કડક કવચ પર અંગ્રેજીની ABCD જેવા વર્ણાક્ષરો લખાયેલા હોવાનું કહેવાય છે. આ અક્ષરો કોઈ માણસોએ બનાવ્યા હોય એવું નથી, પરંતુ કુદરતી રીતે જ કવચ પર કૉન્ટ્રાસ્ટ કલરમાં એવી પૅટર્નના શેપ્સ બનેલા છે જેનાથી અંગ્રેજીના ચોક્કસ વર્ણાક્ષરો ૮ વાંચી શકાય. કાચબાની ઘેરા રંગની પીઠ પર હળવા પીળા રંગના આકારો છે. માત્ર કાચબાની પીઠ પરના નિશાન જ નહીં; એના પગ, ગરદનની રચના પણ સામાન્ય કરતાં જુદા પ્રકારની હોવાનું જણાય છે. એને કારણે આ કોઈ દુર્લભ પ્રજાતિનો કાચબો હોવાની ચર્ચા શરૂ થઈ છે. અલબત્ત, પ્રાણીનિષ્ણાતો દ્વારા નવી પ્રજાતિ વિશેની કોઈ પુષ્ટિ થઈ નથી. ગંડક નદીમાં આવેલા પૂરમાં વહીને આ કાચબો બિહાર પહોંચ્યો હોવાનું મનાય છે. આ દક્ષિણ એશિયામાં મીઠા પાણીમાં જોવા મળતો કાચબો છે. આ કાચબો દુર્લભ પ્રજાતિનો હોવાની સંભાવનાને કારણે એને બિહારના વનવિભાગના નિષ્ણાતોની નિગરાનીમાં રાખવામાં આવ્યો છે.
