18 August, 2026 11:25 AM IST | Motihari | Gujarati Mid-day Correspondent
બિહારમાં પકડાયો બૂટલેગર ઘોડો
બિહારના મોતીહારીમાં પોલીસે દારૂની ચોરીના કેસમાં એક ઘોડાને પકડ્યો છે. એ ઘોડા પાસે ૫૩ લિટર વિદેશી દારૂની બૉટલો મળી હતી. બિહારમાં દારૂબંધી છે એટલે રાજ્યમાં ક્યાંય પણ લાઇસન્સ વિના દારૂ લાવવા-લઈ જવા પર પ્રતિબંધ છે. મોતિહારીની પોલીસને બાતમી મળી હતી કે ચોક્કસ રૂટ પરથી દારૂની ખેપ જઈ રહી છે. પોલીસે ત્યાં જાળ બિછાવતાં દારૂની બૉટલો તો મળી પણ એ ઘોડા પર લદાયેલી હતી. ઘોડાને દોરનારો માણસ પોલીસને જોઈને ભાગી ગયો હતો. જોકે પાછળથી પોલીસે તેને પકડી પાડ્યો હતો જે ઘોડાનો માલિક હતો. રાહુલ નામના આ માલિકે દારૂની હેરફેરમાં સંડોવણી કબૂલી લીધી હતી. તે લગ્નોમાં ઘોડા ભાડે આપવાનો બિઝનેસ કરે છે, પરંતુ લગ્નની સીઝન ન હોય ત્યારે તેને ખૂબ આર્થિક ખેંચ પડે છે. ઑફ સીઝનમાં બે પૈસા કમાઈ લેવા માટે તેણે દારૂની હેરફેર કરવાનું શરૂ કર્યું હતું. ઘોડા પર દારૂ લાવવા-લઈ જવાથી પોલીસને એની ખબર પણ નહોતી પડતી. હવે રાહુલ અને તેના ઘોડા બન્ને પર દારૂચોરીનો કેસ નોંધવામાં આવ્યો છે.
