30 July, 2026 05:37 PM IST | Gaborone | Gujarati Mid-day Correspondent
સિંહોથી બચાવવા માટે બોત્સવાનામાં ખેડૂતો ગાયની પાછળ આંખો બનાવે છે
દક્ષિણ આફ્રિકાના બોત્સવાના દેશમાં ખેડૂતોએ પોતાનાં ઢોરઢાંખરને જંગલી પશુઓના હુમલાથી બચાવવા માટે અનોખો જુગાડ શોધ્યો છે જે ઘણે અંશે સફળ પણ રહ્યો છે. બોત્સવાનામાં આફ્રિકન સિંહોની સંખ્યા ખૂબ છે. આ સિંહો જંગલમાંથી રહેણાક વસાહતોમાં આવીને ગાયોને ઉપાડી જતા હોવાથી ખેડૂતોને ખૂબ તકલીફ થતી હતી. ગાયો જ્યારે ઝૂંડમાં જંગલમાં ચરવા જાય ત્યારે સિંહો મોટા ભાગે પાછળથી હુમલો કરે છે. સિંહો સામા મોંએ હુમલો કરવાનું ટાળે છે. આ ટેક્નિકનો ફાયદો લઈને ખેડૂતોએ ગાયોની પૂંઠ પાસે પૂંછડીની બે તરફ આંખો દોરવાનું શરૂ કર્યું છે. એને કારણે સિંહો હુમલો કરવા જાય ત્યારે આંખો જોઈને એ ધીમા પડી જાય છે. ખેડૂતોનું કહેવું છે કે આ પ્રયોગથી ગાયોનો જીવ બચી રહ્યો છે.
