16 September, 2021 12:42 PM IST | Mumbai | Agency
દીકરી જન્મી તો ૪૦,૦૦૦ની પાણીપૂરી ખવડાવી
ઘરમાં દીકરીનો જન્મ થતાં ભોપાલમાં એક પાણીપૂરીવાળાએ લોકોને મફતમાં પાણીપૂરી ખવડાવીને દીકરા-દીકરી વચ્ચે ભેદ ન કરવાનો સંદેશો આપ્યો હતો. લગ્ન થયાં ત્યારથી અંચલ
ગુપ્તાને સંતાનમાં દીકરી થાય એવી ઇચ્છા હતી. બે વર્ષ પહેલાં એક દીકરાનો જન્મ થયો હતો. જોકે આ મહિનાની ૧૭ ઑગસ્ટે પત્નીએ દીકરીને જન્મ આપ્યો. રવિવારે દીકરાની બીજી વર્ષગાંઠના દિવસે ઘરે દીકરી જન્મી છે એની ઘોષણા કરવા માટે તેણે લોકોને મફતમાં પાણીપૂરી ખવડાવી હતી. અંચલ ગુપ્તા માત્ર આઠ ધોરણ સુધી જ ભણેલો છે. તેણે રવિવારે અંદાજે ૩૫થી ૪૦ હજાર રૂપિયાની પાણીપૂરી મફતમાં ખવડાવી હતી. મોટી સંખ્યામાં લોકો પાણીપૂરી ખાવા માટે ભેગા થયા હતા તેમ જ તેને દીકરીના જન્મ બદલ શુભેચ્છા પાઠવવાની સાથોસાથ એની ઉજવણી કરવાની આ પદ્ધતિનાં પણ વખાણ કર્યાં હતાં.