પ્રેમી સાથે ભાગી ગયેલી દીકરીની તસવીર ચિતા પર મૂકીને પિતાએ અગ્નિસંસ્કાર કર્યા

બીજી બિરાદરીના યુવક સાથે લગ્ન કરવાની જીદે ઘરેથી ભાગી ગયેલી દીકરીને મનાવવામાં નિષ્ફળ પિતાએ તેના ફોટોવાળી નનામી બનાવી ચિતા પર અંતિમ સંસ્કાર કર્યા. આ ઘટના બાદ પિતાએ દીકરી સાથે તમામ સંબંધો તોડી નાખ્યા.

તસવીર ચિતા પર મૂકીને પિતાએ અગ્નિસંસ્કાર કર્યા

પ્રેમી સાથે જ લગ્ન કરવાની જીદે ચડેલી દીકરીને સમજાવવાના તમામ પ્રયત્નો પછી પણ તે ભાગી ગઈ એ ઘટનાથી ખૂબ જ ઘવાયેલા પિતાએ દીકરીની સાન ઠેકાણે લાવવા માટે અલ્ટિમેટ ઇમોશનલ હથિયાર વાપર્યું. જો મારી ઉપરવટ જઈશ તો મારું મરેલું મોં જોજે... એવું મા-બાપ કહેતાં હોય છે, પણ આ પિતાએ દીકરીનો ફોટો મૂકેલી નનામી તૈયાર કરી અને એ નનામીને ચિતા પર મૂકીને અંતિમ સંસ્કાર પણ કરી દીધા. જેઠવાડા જિલ્લાના એક ગામમાં દીકરી બીજી બિરાદરીના યુવક સાથે પ્રેમમાં હતી. થોડા દિવસ પહેલાં તે અચાનક ઘરેથી ગાયબ થઈ ગઈ હતી. તેના કોઈ સગડ ન મળતાં પરિવારે પહેલાં તો પોલીસમાં ફરિયાદ નોંધાવી. પોલીસે તરત જ પગલાં લઈને તેને પ્રેમી યુવક સાથે પકડી પાડી. પોલીસચોકીમાં આવ્યા પછી પણ યુવતી પ્રેમી સાથે જ લગ્ન કરવાની જીદ લઈને બેઠી હતી અને કેમેય માનતી નહોતી એટલે પિતાએ તેની નજર સામે જ તેના ફોટોના અંતિમ સંસ્કાર કરીને દીકરી સાથે તમામ સંબંધો તોડી નાખ્યા.