ભગવાનને ફોન લગાવો, બહુ વરસાદ કરી રહ્યા છે

ઉત્તર પ્રદેશના હરદોઈમાં સતત વરસાદથી પરેશાન નાગરિકે કલેક્ટરની ઑફિસમાં અનોખી ફરિયાદ કરી. તેણે ઇન્દ્રદેવને જરૂરી દિશા-નિર્દેશ આપવા અપીલ કરી અને વ્યંગમાં લખ્યું કે તેની પાસે ઇન્દ્રદેવનો મોબાઇલ નંબર નથી, તેથી દિવ્ય માધ્યમથી સંપર્ક કરાય.

ઇન્દ્રદેવને ફરિયાદ

ઉત્તર પ્રદેશના હરદોઈમાં ભારે વરસાદથી પરેશાન થઈ ગયેલા એક નાગરિકે કલેક્ટરની ઑફિસમાં જઈને હવે વરસાદ ખમૈયા કરે એ માટે પગલાં લેવાની વિનંતી કરી હતી. ફરિયાદીએ લખ્યું હતું કે ‘ઇન્દ્રદેવને આવશ્યક દિશા-નિર્દેશ આપો અને સમજાવો. છેલ્લા કેટલાય કલાકોથી ક્યારેક ભારે તો ક્યારેક ધીમો વરસાદ લગાતાર પડ્યા જ કરે છે અને જનજીવન પ્રભાવિત થઈ ગયું છે. નીચાણવાળા વિસ્તારોમાં પાણી ભરાઈ ગયાં છે. લોકો ઘરની બહાર નીકળી શકે એમ નથી અને રોજબરોજનું કામકાજ પણ કરી શકે એમ નથી.’
ફરિયાદીએ વ્યંગમાં એ પણ સ્પષ્ટ કર્યું છે કે મારી પાસે ઇન્દ્રદેવનો મોબાઇલ-નંબર નથી એટલે નોટિસ કે નિર્દેશ આપવા માટે દિવ્ય સંપર્ક માધ્યમનો ઉપયોગ કરવાની કૃપા કરશો.