પ્રેગ્નન્ટ ભેંસના પેટમાંથી સર્જરી કરીને લોખંડના ૬૬ ટુકડા કાઢવામાં આવ્યા

હિમાચલ પ્રદેશના ઉના જિલ્લામાં એક બીમાર ભેંસની સારવાર દરમ્યાન અત્યંત ચોંકાવનારો કિસ્સો સામે આવ્યો

પ્રતીકાત્મક તસવીર

હિમાચલ પ્રદેશના ઉના જિલ્લામાં એક બીમાર ભેંસની સારવાર દરમ્યાન અત્યંત ચોંકાવનારો કિસ્સો સામે આવ્યો. એક પશુ-ચિકિત્સાલયમાં ૯ મહિનાની પ્રેગ્નન્ટ ભેંસ લાવવામાં આવી હતી. એના માલિકો એને ડૉક્ટર પાસે લઈ આવ્યા ત્યારે એનું પેટ ફૂલી ગયેલું હતું.અને પેટને અડવાથી પણ ભેંસ કરાંજતી હતી. ફૂલેલું પેટ વછેરાને કારણે હશે એવું માનતા માલિકે પહેલાં તો ધ્યાન નહોતું આપ્યું, પણ જ્યારે એણે ૧૦ દિવસથી ચારો ખાવાનું બંધ કરી દીધું ત્યારે માલિકને કંઈક અજુગતું લાગ્યું. ડૉક્ટરોએ તપાસ કરી તો ખબર પડી કે એના પેટમાં ધાતુ જેવી કડક ચીજ છે. ભેંસ ગર્ભવતી હોવા છતાં ડૉક્ટરોએ એના પેટની સર્જરી કરી અને આંતરડામાંથી લોખંડના ૬૬ ટુકડા કાઢ્યા હતા. જો સમયસર એ ધારદાર ટુકડા કાઢી લેવામાં ન આવ્યા હોત તો આંતરિક અવયવો ફાટી જઈને ગર્ભમાં ઊછરી રહેલા વછેરાને પણ નુકસાન થયું હોત. જોકે સર્જરી સફળ રહી હતી અને હવે ભેંસની હાલત સ્થિર છે.