કપલે રીલમાં સોનાના દાગીના અને રોકડ પાથરીને શોઑફ કર્યો, ચોરો ઘરફોડી કરીને સાફ કરી ગયા

કન્યાકુમારીમાં મધુમિતા અને વિનોદકુમારના ઘરમાં ઘરફોડી કરીને ચોરો લગભગ ૧ કિલો સોનું અને રોકડ લઈ ગયા. પોલીસને શંકા છે કે યુટ્યુબ રીલ્સમાં કપલ દ્વારા સોનું અને રોકડનો દેખાડો કરાતો હોવાથી ચોરોને સંપત્તિની જાણ થઈ હશે.

કન્યાકુમારી ચોરી

તામિલનાડુના કન્યાકુમારીમાં મધુમિતા અને વિનોદકુમાર નામના એક યુગલના ઘરે રાતના સમયે ઘરફોડી થઈ અને ભારે માત્રામાં સોનું અને કૅશ લૂંટાઈ ગયાં. ચોરો ઘરના પાછળના દરવાજાને તોડીને ઘૂસ્યા હતા અને તિજોરીમાંથી સોનાનાં ઘરેણાં અને રોકડ પર હાથ સાફ કર્યો હતો. ચોરી કેટલા વાગ્યે થઈ, કેટલા ચોર હતા એ હજી ખબર નથી પડી. જોકે ચોરીની તપાસ દરમ્યાન પોલીસ શોધી રહી હતી કે કપલના ઘરમાં આટલી માલમતા પડી છે એની જાણકારી કોને-કોને હોઈ શકે છે? જોકે આ સવાલના જવાબમાં જે જાણવા મળ્યું એ અચરજભર્યું હતું. મધુમિતા અને વિનોદકુમાર તેમની યુટ્યુબ ચૅનલ પર જે રીલ્સ મૂકતાં હતાં એમાં પોતાની દોલતનો જબરો દેખાડો કરતાં હતાં. નિતનવીન સોનાના વિવિધ દાગીના પહેરવા અને રોકડનો દેખાડો કરવો તેમના માટે સામાન્ય હતું. પોલીસને પ્રાથમિક તપાસમાં તો એવું જ લાગે છે કે કપલના વિડિયો જોઈને તેમની પાસેની સંપત્તિનો અંદાજ ચોરોએ લગાવ્યો હશે. ચોરો કુલ ૯૯૪ ગ્રામ એટલે કે લગભગ ૧ કિલો સોનાના દાગીના અને મોટી કૅશ ચોરી ગયા છે.