મમ્મી અને પોલીસ બન્ને ડ્યુટી એકસાથે

સોશ્યલ મીડિયામાં આ તસવીરોને ભરપૂર વધામણાં મળ્યાં છે તો કેટલાક લોકોએ નાની પુત્રી સાથે માતાને તડકામાં ઊભી રાખવા બદલ ટીકા પણ કરી હતી. 

મમ્મી અને પોલીસ બન્ને ડ્યુટી એકસાથે

મધ્ય પ્રદેશના અલીરાજપુર જિલ્લાની એક મહિલા પોલીસ અધિકારીની તસવીરો વાઇરલ થઈ છે, જેમાં તેમની ખૂબ પ્રશંસા થઈ રહી છે. મુખ્ય પ્રધાન શિવરાજ સિંહ ચૌહાણે ટ્વિટર પર મોનિકા સિંહ નામની આ પોલીસ તેની દોઢ વર્ષની દીકરીને લઈને ડ્યુટી પર હાજર હોવાની તસવીરો શૅર કરી હતી. 
બે દિવસના પ્રચારમાં નીકળેલા મુખ્ય પ્રધાન શિવરાજ સિંહ ચૌહાણનું હેલિકૉપ્ટર ગુરુવારે અલીરાજપુરમાં હેલિપૅડ પર ઊતર્યું હતું. ત્યાં મધ્ય પ્રદેશના ધાર જિલ્લાનાં ડીએસપી મોનિકા સિંહને ફરજ પર મૂકવામાં આવ્યાં હતાં. મોનિકા સિંહ બેબી કૅરિયર બૅગમાં પોતાના બાળક સાથે ત્યાં ડ્યુટી પર ઉપસ્થિત હતાં એ જોઈને મુખ્ય પ્રધાને તેમને વધાવ્યાં હતાં.
મુખ્ય પ્રધાને મોનિકા સિંહની તસવીરો ટ્વિટર પર શૅર કરીને સાથે લખ્યું હતું કે મધ્ય પ્રદેશને તમારા પર ગર્વ છે. તેમની દીકરીને મુખ્ય પ્રધાને આશીર્વાદ આપ્યા હતા. મોનિકા સિંહે આ ઘટના સંદર્ભે કહ્યું હતું કે તેમણે માતા તરીકેની અને પોલીસ-અધિકારી તરીકેની બન્ને જવાબદારી નિભાવવાની છે. સોશ્યલ મીડિયામાં આ તસવીરોને ભરપૂર વધામણાં મળ્યાં છે તો કેટલાક લોકોએ નાની પુત્રી સાથે માતાને તડકામાં ઊભી રાખવા બદલ ટીકા પણ કરી હતી.