02 August, 2026 01:03 PM IST | Amritsar | Gujarati Mid-day Correspondent
જિમ-ટ્રેઇનરે પોતાના ટી-શર્ટનો પરસેવો નિચોવીને યુવકને પીવડાવ્યો
પંજાબમાં એક જિમ-ટ્રેઇનરે તેની પાસે વર્કઆઉટ કરવા આવતા એક યુવાનને પોતાનો પરસેવો પીવડાવ્યો હતો. આ પરસેવા માટે તેણે પોતાનું ટી-શર્ટ નીચોવ્યું અને એમાંથી નીકળેલું પ્રવાહી યુવકના મોંમાં રેડ્યું અને કહ્યું કે આ પીશ તો મસ્ત તગડો થઈ જઈશ. આ ઘટનાનો ૮ સેકન્ડનો વિડિયો સોશ્યલ મીડિયા પર પહોંચ્યો તો હોબાળો મચી ગયો. અમૃતસરના એક જિમની આ ઘટના છે, જેમાં જિમ-ટ્રેઇનર પોતાના ટી-શર્ટને નિચોવે છે અને યુવાન બે હાથમાં પરસેવો ઝીલીને એ પીએ છે. ટ્રેઇનરનો દાવો છે કે તેણે આ મજાક ખાતર કર્યું હતું અને આનો વિડિયો પોસ્ટ નહીં કરવાનું યુવકને કહ્યું હતું. સોશ્યલ મીડિયા પર જબરી થૂથૂ થયા પછી ટ્રેઇનર તેજબીર સિંહે માફી માગીને કહ્યું હતું કે આ વિડિયો માત્ર રીલ બનાવવા માટે ભજવાયો હતો, પણ હવેથી આવી કન્ટેન્ટ નહીં બનાવું.
