ચોરી ન થાય એ માટે ખેતરમાં પાંચ લાખ રૂપિયા દાટી દીધેલા, ઊધઈ ચટ કરી ગઈ ચલણી નોટો

રાજસ્થાનના બાલોતરા પાસે એક ખેડૂતે ચોરીથી બચાવવા પાંચ લાખ રૂપિયા ખેતરમાં દાટી દીધા હતા. એક વર્ષ બાદ ખેતરમાંથી થેલી મળી, પરંતુ મોટાભાગની ચલણી નોટો ઊધઈ ખાઈ ગઈ હતી.

ચોરી ન થાય એ માટે ખેતરમાં પાંચ લાખ રૂપિયા દાટી દીધેલા, ઊધઈ ચટ કરી ગઈ ચલણી નોટો

રાજસ્થાનના બાલોતરા પાસેના નેવાઈ ગામમાં એક ખેડૂતે બચતના પાંચ લાખ રૂપિયા કોઈ ચોરી ન જાય એ માટે પ્લાસ્ટિકની એક થેલીમાં ભરીને એને ખેતરમાં દાટી દીધી હતી. ઘરમાં રાખે તો દીકરાઓની નજર પણ એના પર પડે. એવું ન થાય એ માટે બચતને ઘરની બહાર જૂના જમાનાની જેમ ખેતરમાં દાટી દેવાનું ખેડૂતને ઠીક લાગ્યું. જોકે એ પછી ખેડૂત ભૂલી ગયો કે ખેતરમાં ક્યાં એ દલ્લો દાટવામાં આવ્યો હતો. એક વર્ષ પછી વાવણીનું કામ કરવાનું હતું ત્યારે ટ્રૅક્ટર દ્વારા ખેતર ખેડાઈ રહ્યું હતું એ વખતે પ્લાસ્ટિકની આ થેલી જમીનમાંથી મળી આવી હતી. જોકે થેલી ખોલતાં જ એમાંની ૫૦૦ રૂપિયાની ચલણી નોટોની હાલત જોઈને ખેડૂતનું હૈયું ચિરાઈ ગયું. લગભગ તમામ ચલણી નોટો પર ઊધઈ લાગી ગઈ હતી અને બધી જ નોટો સડીને અડધી ખવાઈ ગઈ હતી. હવે આવી નોટોનું શું કરવું? ખેડૂત આ ફાટેલી નોટોને લઈને સ્થાનિક બૅન્કમાં ગયો. જોકે એકેય નોટ આખી ન હોવાથી તેને જયપુરમાં આવેલી ભારતીય રિઝર્વ બૅન્કની બ્રાન્ચમાં જવાની સલાહ આપવામાં આવી છે.