06 January, 2026 03:01 PM IST | Lucknow | Gujarati Mid-day Correspondent
નૅશનલ હાઇવે પર થયો ચાંદીનો વરસાદ, લોકો માંડ્યા લૂંટવા
ઉત્તર પ્રદેશના હાપુડમાં સોમવારે એક એવી ઘટના ઘટી કે નૅશનલ હાઇવે પર સફર કરતા લોકોને ચાંદી જ ચાંદી થઈ ગઈ. વાત એમ હતી કે હાપુડ-બુલંદશહર વચ્ચેના હાઇવે પર ચાંદી જેવી ધાતુનાં ઘરેણાંના ઝીણા ટુકડા વિખેરાયેલા જોવા મળ્યા હતા. લોકોને જેવી ખબર પડી કે આ ચળકતા ધાતુના ટુકડા ચાંદીના હોઈ શકે છે એટલે વાહનો બાજુમાં પાર્ક કરીને આ ટુકડા વીણવા લાગી પડ્યા. આને કારણે હાઇવે પર લાંબો જૅમ લાગી ગયો હતો. કદાચ કોઈ વાહનમાં જૂનાં ઘરેણાંના ટુકડાને ગાળવા માટે લઈ જવાઈ રહ્યા હશે. કદાચ એ વાહનમાંથી ટુકડા ખરી રહ્યા છે એની વાહનચાલકને પણ ખબર નહીં હોય. જોકે એક જગ્યાએ થોડોક ટ્રાફિક જમા થયો હતો ત્યારે બાઇકરોને આ ચળકતા ટુકડા દેખાયા હતા અને બે-ચાર જણને એ વીણતા જોઈને અનેક લોકો રોડ પર ચાંદીના ટુકડા વીણવામાં લાગી ગયા હતા. વાત એટલી વણસી કે ટ્રાફિક જૅમને કારણે પોલીસને બોલાવવી પડી. પોલીસ હવે એ વાહનની તલાશમાં છે જેમાંથી આ ધાતુના ટુકડા વેરાયા હતા. કદાચ એ વાહન ચાંદીનાં જૂનાં ઘરેણાંના કચરાને લઈને ક્યાંક જઈ રહ્યું હશે અને રસ્તામાં બોરીઓ છૂટી જતાં ચાંદીનાં ઘરેણાંના ટુકડા વિખેરાયા હશે. પોલીસ હવે હાઇવે પર લગાવેલા કૅમેરાનું ફુટેજ તપાસી રહી છે.
