બાળકે ફ્લાઇટમાં બેસીને સીટબેલ્ટ ન પહેર્યો એને પગલે ફ્લાઇટ ૧૨ કલાક મોડી ઊડી

કેનેડામાં ૬ વર્ષના બાળકની સીટબેલ્ટ ન બાંધવાની જીદને કારણે ફ્લાઇટ કૅન્સલ થઈ અને મુસાફરોને લગભગ ૧૨ કલાક બાદ બીજા દિવસે ટૉરોન્ટો લઈ જવાયા.

બાળકે ફ્લાઇટમાં બેસીને સીટબેલ્ટ ન પહેર્યો એને પગલે ફ્લાઇટ ૧૨ કલાક મોડી ઊડી

કૅનેડામાં એક બાળકની સીટબેલ્ટ નહીં લગાવવાની જીદને કારણે એક ફ્લાઇટ મોડી પડી. એટલી મોડી કે એ છેક બીજા દિવસે લગભગ ૧૨ કલાક બાદ ટેક-ઑફ થઈ શકી. કૅનેડાની પૉર્ટર ઍરલાઇન્સની આ ફ્લાઇટ બ્રિટિશ કોલંબિયાના વિક્ટોરિયા ઍરપોર્ટથી ટૉરોન્ટો જઈ રહી હતી. બધા જ મુસાફરો બોર્ડ થઈ ગયા પછી સીટબેલ્ટ બાંધવાની છેલ્લી સૂચના ઍરહોસ્ટેસ આપી રહી હતી. એ વખતે એક ૬ વર્ષનું બાળક સીટબેલ્ટ બાંધવાની આનાકાની કરવા લાગ્યું. મા અને કૅબિન-ક્રૂએ સમજાવીને તેને સીટબેલ્ટ લગાવવાની કોશિશ કરી પણ કામિયાબી ન મળી. બાળક કાં તો સીટ પર ઊભો થઈ જતો હતો કાં સીટની નીચે છુપાઈ જતો હતો. ટેક-ઑફ અને લૅન્ડિંગ દરમ્યાન સીટબેલ્ટ બાંધવાનો ફરજિયાત હોવાથી આખરે કૅબિન-ક્રૂએ નક્કી કર્યું કે આ છોકરાને તેની મા સાથે ફ્લાઇટમાંથી ઉતારી દેવામાં આવે. એ પછી છોકરાની માને આ વાત સમજાવવામાં થોડોક સમય ગયો. પ્લેનને પાછું હૅન્ગર પર લાવીને મા-દીકરાને ઉતારવામાં આવ્યાં. જોકે મુશ્કેલી અહીં પૂરી ન થઈ. વિક્ટોરિયા ઍરપોર્ટ નાનું હોવાથી રાતે ૧૨.૩૦ વાગ્યે અહીંનો રન-વે બંધ થઈ જાય છે. આ બધી ઝંઝટ ચાલી રહી હતી ત્યારે ઑલરેડી એ સમય પસાર થઈ ગયો અને રન-વે બંધ થઈ ગયો. આખરે બધા જ પૅસેન્જરોને ઉતારીને એ ફ્લાઇટ કૅન્સલ જાહેર કરવી પડી. બીજા દિવસે રન-વે ખૂલ્યો એ પછીથી પૅસેન્જરોને ટૉરોન્ટો લઈ જવા માટે ફ્લાઇટ ઊપડી.