21 March, 2023 12:20 PM IST | London | Gujarati Mid-day Correspondent
પ્રતીકાત્મક તસવીર
ડૉગીઓ સામાન્ય રીતે એના માલિકોનું ધ્યાન આકર્ષિત કરવા પોતાનું માથું એક તરફ ઝુકાવીને લાડ કરતા હોય છે. માલિકો પણ ડૉગીની આ હરકત પર વારી જતા હોય છે. ડૉગીઓની આ હરકત સામાન્ય રીતે તેમની કોઈ મૂંઝવણ કે ઉત્સુકતા ગણાય છે. જોકે હાલમાં ઇઓટ્વોસ લૉરેન્ડ યુનિવર્સિટીની પોસ્ટ ડૉક્ટરલ ફેલો ઍન્ડ્રિયા સોમેસે સંશોધકોની ટીમ સાથે મળીને ડૉગીઓની આ ચેષ્ટા પર સંશોધન કરીને એનું કારણ જાણવાનો પ્રયાસ કર્યો છે. એ માટે તેમણે વિવિધ રમકડાનાં નામ યાદ રાખી કે શીખી શકે એવા પ્રતિભાશાળી ડૉગીઓના એક જૂથ પર પ્રયોગ કર્યો હતો.
આ પણ વાંચો: ડૉગી સમજ્યા હતા, નીકળ્યો રીંછ...
મોટા ભાગના ડૉગી માત્ર બે કે ત્રણ રમકડાંનાં નામ યાદ રાખી શકતા હોય છે, પરંતુ આ પ્રતિભાશાળી ડૉગીઓ લગભગ ૧૦ જેટલાં તથા વ્હિસ્કી નામનો ડૉગી ૫૯માંથી ૫૪ રમકડાંનાં નામ યાદ રાખવામાં સફળ રહ્યો હતો. એના પરથી આ સંશોધકો એવા તારણ પર આવ્યા હતા કે ડૉગીઓ એકાગ્ર થઈને ચીજો યાદ કરવાના પ્રયાસમાં તેમનું માથું એક તરફ નમાવતા હોય છે. આવા ડૉગીઓ તેમના માલિકે તેમને બીજી રૂમમાં રાખ્યા હોય તો પણ ઇચ્છિત રમકડું શોધીને લાવી શકે છે.