20 August, 2026 12:42 PM IST | Switzerland | Gujarati Mid-day Correspondent
ઍરબૅગ પરથી ૯૨ ફુટ ઊંચો કૂદકો મારવાનો રેકૉર્ડ
સ્વિટ્ઝરલૅન્ડના બ્રુનેનમાં એક લેકમાં રૉબિન સ્ટેઇનર નામના કરતબબાજે ઍરબૅગ બ્લૉબિંગ થકી સૌથી ઊંચો કૂદકો મારવાનો ગિનેસ વર્લ્ડ રેકૉર્ડ બનાવ્યો છે. ઍરબૅગ બ્લૉબિંગ એ એક પ્રકારની વૉટર સ્પોર્ટ્સ છે. એમાં પાણીની અંદર જાયન્ટ ઍરબૅગ મૂકેલી હોય છે. એ ઍરબૅગના એક છેડે એક વ્યક્તિ ઊભેલી હોય છે. એના બીજા છેડા પર એક, બે કે ત્રણ લોકો ખૂબ ઊંચાઈએથી ઍરબૅગ પર કૂદકો મારે છે. બૅગમાં ભરાયેલી હવાનું પહેલા છેડા પર એટલું પ્રેશર આવે છે કે ત્યાં ઊભેલી વ્યક્તિ હવામાં ઊછળે છે. ભૌતિકશાસ્ત્રના નિયમ મુજબ જેટલા જોરથી બીજા છેડે પ્રેશર આવે એટલા જ વળતા જોરથી પહેલા છેડાનો માણસ આકાશમાં ઊંચો ઊછળે અને તળાવના પાણીમાં લૅન્ડ થાય. બાવીસ વર્ષના રૉબિન સ્ટેઇનરે તેની સાથે સ્ટન્ટમાં બીજા ત્રણ સાથીઓની મદદ લીધી હતી. ત્રણ સાથીઓએ બીજા છેડેથી ઍરબૅગ પર ભૂસકો માર્યો હતો અને રૉબિન હવામાં ૯૨.૫ ફુટ ઊંચે ઊછળ્યો હતો. ૯ ઑગસ્ટે થયેલા આ સ્ટન્ટને ગિનેસ વર્લ્ડ રેકૉર્ડ્સમાં સ્થાન મળ્યું છે.
