બાળકે મમ્મીના ગળામાં સાઇકલનું લૉક ભરાવ્યું અને અનલૉકનો કોડ ભૂલી ગયો

થોડી જ વારમાં માને સમજાયું કે રમતાં-રમતાં તેણે અનલૉક કરવાનો પાસવર્ડ બદલી નાખ્યો અને હવે નવો નંબર યાદ ન આવતાં તે ખોલવાની કોશિશ કરી રહ્યો છે. 

બાળકે મમ્મીના ગળામાં સાઇકલનું લૉક ભરાવ્યું અને અનલૉકનો કોડ ભૂલી ગયો

નાનપણમાં બાળકોની બદમાશીની કોઈ સીમા નથી હોતી. ગમે એટલો મોટો કાંડ કરે તો પણ બાળપણની શેતાનીમાં ખપી જાય છે પરંતુ એના કારણે મોટાઓને અને વિશેષ કરીને જે આખો દિવસ તેમની સંભાળમાં ગાળતી હોય તે મમ્મીઓને કેટલું સહન કરવું પડે છે એ તો જેના પર વીતે તેને જ ખબર પડે. 
ચીનના જીયાંગસસુ પ્રાંતના હુઆયાનમાં ચાર વર્ષના બાળકે તેની સાઇકલનું લૉક મમ્મીના ગળામાં ભરાવી દીધું પણ પછી એને અનલૉક કરવાનો કોડ ભૂલી જતાં માની હાલત કફોડી થઈ હતી. ઘટના ૭ ઑક્ટોબરની છે. 
સાઇકલના લૉક સાથે રમી રહેલા બાળકે રમત-રમતમાં લૉક તેની મમ્મીના ગળામાં ભરાવી દીધું. શરૂમાં તો બાળકને લાગ્યું કે તે રમત રમી રહ્યો છે. થોડી જ વારમાં માને સમજાયું કે રમતાં-રમતાં તેણે અનલૉક કરવાનો પાસવર્ડ બદલી નાખ્યો અને હવે નવો નંબર યાદ ન આવતાં તે ખોલવાની કોશિશ કરી રહ્યો છે. 
ગભરાઈ ગયેલી માતાએ પોલીસ સ્ટેશનની મુલાકાત લીધી. જોકે તેઓ મદદ કરી શક્યા નથી. ત્યાર બાદ ફાયર ફાઇટર્સની ટીમ એને અનલૉક કરવા બોલાવાઈ જેમણે તેના ગળા ફરતે ટુવાલ વીંટાળ્યો અને વાયરકટર્સની મદદથી લૉક દૂર કર્યું.