મેક્સિકોના મેયરે દર વર્ષની જેમ ફરીથી મગર સાથે લગ્ન કરીને એને કિસ કરી

૨૩૦ વર્ષથી આ પરંપરા નિભાવાય છે અને આ પરંપરાને સારા વરસાદ, ભરપૂર પાક અને સમૃદ્ધિનું પ્રતીક માનવામાં આવે છે

વાઇરલ વિડીયોમાંથી સ્ક્રીનશૉટ

મેક્સિકોના સૅન પેડ્રો શહેરમાં દર વર્ષે મેયરનાં લગ્ન એક કૅમન પ્રજાતિના મગર સાથે કરાવવામાં આવે છે. ૨૩૦ વર્ષથી આ પરંપરા નિભાવાય છે અને આ પરંપરાને સારા વરસાદ, ભરપૂર પાક અને સમૃદ્ધિનું પ્રતીક માનવામાં આવે છે. આ વર્ષે શહેરના મેયર ડૅનિયલ ગુટિયરેઝે એના સિન્તિયા નામની મગર સાથે પ્રતીકાત્મક લગ્ન કર્યાં હતાં. લગ્ન પહેલાં માદા મગરને સફેદ રંગનું વેડિંગ ગાઉન પહેરાવીને દુલ્હનની જેમ સજાવવામાં આવી હતી. બૅન્ડવાજાં સાથે આખા શહેરમાં મગરવધૂની યાત્રા નીકળી હતી અને પછી લગ્નમંડપમાં પ્રતીકાત્મક લગ્ન થયાં હતાં. માન્યતા છે કે આ પરંપરા બે આદિવાસી સમુદાયની વચ્ચે થયેલા ઐતિહાસિક સમાધાન અને શાંતિકરારની યાદમાં નિભાવવામાં આવે છે. લોકોને વિશ્વાસ છે કે આ પરંપરા નિભાવવાથી આખા શહેરની સુખ અને સમૃદ્ધિ વધે છે. લગ્ન કર્યા પછી મેયર મગરને કિસ પણ કરે છે. એ પછી પરિણીત મગરને ખાસ સંગ્રહાલયમાં સાચવવામાં આવે છે.