૧૯૭૦માં યુદ્ધ સમયે બચવા માટે બનાવેલું આ બંકર ૭૫ કરોડમાં વેચાવા નીકળ્યું છે

અમેરિકાના લાસ વેગસમાં ન્યુક્લિયર બૉમ્બની અસરથી બચાવે એવું એક આલીશાન ઘર બનાવવામાં આવ્યું હતું

લાસ વેગસનું ઘર

અમેરિકાના લાસ વેગસમાં ન્યુક્લિયર બૉમ્બની અસરથી બચાવે એવું એક આલીશાન ઘર બનાવવામાં આવ્યું હતું. કોલ્ડ વૉરના ડરને કારણે એ વખતે આ ઘરને એવી રીતે સજાવવામાં આવ્યું હતું જાણે અહીં મહિનાઓ સુધી રહેવાનું હોય તોય વાંધો ન આવે. આ ઘરમાં પાંચ બેડરૂમ, છ બાથરૂમ, પૂલ, ડાન્સ-ફ્લોર અને મસ્ત કૅફે-એરિયા છે. આસપાસમાં નકલી પહાડોનું રળિયામણું દૃશ્ય છે અને માથે વાદળાં સહિત આકાશનો અહેસાસ કરાવે એવી છત છે. આ બંકર બે માળના એક ઘરની ૩૦ ફુટ નીચે બનાવવામાં આવ્યું છે. કોલ્ડ વૉરના ગાળામાં અમેરિકા અને સોવિયટ સંઘ વચ્ચેનો તનાવ ચરમસીમા પર હતો એ વખતે અમેરિકાના અનેક પરિવારો ન્યુક્લિયર હુમલાથી બચવા માટે ઘરોમાં બંકર બનાવતા હતા. એ જ વખતે આ અનોખું ઘર બન્યું હતું જેમાં રિયલ ઘર કરતાં બંકર વધુ લક્ઝુરિયસ છે. જે સ્વેજ નામના આર્કિટેક્ટે આ ઘર બનાવેલું જે કોઈ પણ પ્રકારના પ્રલયનો સામનો કરી શકે એવું છે. સમયાંતરે આ ઘરની અંદરનું ઇન્ટીરિયર થોડુંક બદલવામાં આવેલું. બાકી રચના એવી ને એવી જ છે. એક એકર જમીનની નીચે ફેલાયેલા આ ઘરમાં ૧૬,૯૩૬ સ્ક્વેર ફુટની લિવિંગ-સ્પેસ છે. જનરેટર, ૧૦૦૦ ગૅલનની વૉટર-ટૅન્ક અને ઇલેક્ટ્રિસિટી સાથે એ સુસજ્જ છે.

વચ્ચે થોડાંક વર્ષો આ ઘરને મ્યુઝિયમમાં તબદિલ કરી દેવામાં આવેલું. અહીં ફિલ્મનું શૂટિંગ, ઇવેન્ટ્સ અને પ્રાઇવેટ પાર્ટીઓ થઈ શકે છે. ૨૦૧૪માં આ ઘર ફ્રૅન્કી લુઇ નામના માણસે ૧૦ કરોડ રૂપિયામાં ખરીદેલું. હવે આ ઘર ફરીથી વેચાવા નીકળ્યું છે જેની કિંમત અંદાજે ૭૫ કરોડ રૂપિયાની અંકાઈ રહી છે.