બૉટલમાં પેટ્રોલ ન આપ્યું તો બાઇકની પેટ્રોલ-ટૅન્ક ઉઠાવીને પહોંચ્યો

બાટલીમાં પેટ્રોલ ન ભરી આપો, પણ વાહનની ટાંકીમાં તો પેટ્રોલ આપવું જ પડેને?

સોશ્યલ મીડિયા પર આવો જ એક કિસ્સો વાઇરલ થયો છે

પેટ્રોલ-પમ્પ પર ફ્યુઅલ હંમેશાં તમારા વાહનમાં જ ભરીને મળે છે. તમે બાટલી કે કેનમાં અલગથી ભરીને પેટ્રોલ લાવી નથી શકતા. જોકે ઘણી વાર અચાનક વાહન બંધ પડી ગયું હોય ત્યારે નાની બૉટલમાં પણ પેટ્રોલ લેવું જ પડે છે. જો ન મળે તો વાહન ખેંચીને પેટ્રોલ-પમ્પ સુધી લઈ જવું પડે. સોશ્યલ મીડિયા પર આવો જ એક કિસ્સો વાઇરલ થયો છે. હાલમાં ફ્યુઅલની અછત છે અને લોકો ફ્યુઅલ માટે લાઇનો લગાવીને પેટ્રોલ-પમ્પ પર ઊભેલા જોવા મળે છે ત્યારે બાટલીમાં પેટ્રોલ મળે એવી કોઈ સંભાવના હતી જ નહીં. એમ છતાં એક યુવક પહેલાં બાટલી લઈને પેટ્રોલ લેવા જાય છે. સ્વાભાવિકપણે પેટ્રોલ-પમ્પવાળાએ ધરાર ના પાડી દીધી. હવે બાઇકર મૂંઝાયો. જોકે તેણે જે જુગાડ કાઢ્યો એ જોઈને નજરે જોનારા લોકો જ નહીં, ઇન્ટરનેટ પર પણ ભાઈસાહેબ ફેમસ થઈ ગયા છે. ભાઈએ પોતાના બાઇકની ખાલી ટાંકી બાઇકથી જુદી કરી અને એ ટાંકી ઊંચકીને પેટ્રોલ-પમ્પ પર પહોંચ્યા. હવે શું કરવું? બાટલીમાં પેટ્રોલ ન ભરી આપો, પણ વાહનની ટાંકીમાં તો પેટ્રોલ આપવું જ પડેને? પેટ્રોલ-પમ્પવાળાને પણ આ ભાઈ જેન્યુઇન લાગ્યા એટલે એ ટાંકી ફુલ કરી આપી.