સોના કરતાં પણ કીમતી છે આ પક્ષીની લાળ : સ્વિફ્ટલેટની લાળમાંથી બનાવાયેલા માળાનો સૂપ છે હેલ્ધી

સોના કરતાં પણ કીમતી છે આ પક્ષીની લાળ : સ્વિફ્ટલેટની લાળમાંથી બનાવાયેલા માળાનો સૂપ છે હેલ્ધી, કુદરતે દુનિયામાં એવા અસંખ્ય જીવોનું સર્જન કર્યું છે જેઓ પોતાની અનોખી વિશેષતાઓ માટે જાણીતા છે.

સોના કરતાં પણ કીમતી છે આ પક્ષીની લાળ : સ્વિફ્ટલેટની લાળમાંથી બનાવાયેલા માળાનો સૂપ છે હેલ્ધી

કુદરતે દુનિયામાં એવા અસંખ્ય જીવોનું સર્જન કર્યું છે જેઓ પોતાની અનોખી વિશેષતાઓ માટે જાણીતા છે. આવું જ એક અદ્ભુત પક્ષી છે સ્વિફ્ટલેટ, જેનો માળો આજના સમયમાં સોના કરતાં પણ વધુ મોંઘા ભાવે વેચાય છે. સામાન્ય રીતે પક્ષીઓ તણખલાં, પાંદડાં કે સળીઓ ભેગી કરીને માળો બનાવતાં હોય છે; પરંતુ સ્વિફ્ટલેટ પક્ષી તણખલાંથી નહીં પણ પોતાની લાળ વડે માળો તૈયાર કરે છે જે હવાના સંપર્કમાં આવતાં જ સુકાઈને એકદમ કડક અને નક્કર બની જાય છે.

ઇન્ટરનૅશનલ માર્કેટમાં, ખાસ કરીને એશિયાના દેશોમાં આ માળાની કિંમત આસમાને છે. એક કિલો માળાની કિંમત લાખો રૂપિયામાં બોલાય છે. ચીન, હૉન્ગકૉન્ગ અને સિંગાપોર જેવા દેશોમાં આ માળાનો ઉપયોગ ખાસ પ્રકારનો બર્ડ નેસ્ટ સૂપ બનાવવામાં થાય છે. આ સૂપને સ્વાસ્થ્ય માટે અત્યંત ગુણકારી, ત્વચાને ચમકદાર રાખનાર અને રોગપ્રતિકારક શક્તિ વધારનાર માનવામાં આવે છે. આ જ કારણે વિદેશની મોંઘી રેસ્ટોરાંમાં અમીર લોકો આ સૂપ પીવાનું ખૂબ પસંદ કરે છે.

સ્વિફ્ટલેટ પક્ષી પોતાના કપ આકારના માળા દરિયાકિનારાની ઊંચી ગુફાઓ, અંધારાવાળી જગ્યાઓ અને પહાડી ખડકો પર બનાવે છે. સદીઓ જૂની ચીની પરંપરામાં આ માળાના સૂપનું વિશેષ મહત્ત્વ છે, કારણ કે એમાં ભરપૂર માત્રામાં પ્રોટીન, અમીનો ઍસિડ અને મિનરલ્સ મળી આવે છે. એને ગર્ભવતી મહિલાઓ અને વૃદ્ધોના સ્વાસ્થ્ય માટે ઉત્તમ ટૉનિક માનવામાં આવે છે.