12 August, 2026 11:03 AM IST | Lisbon | Gujarati Mid-day Online Correspondent
તસવીર સૌજન્યઃ સોશ્યલ મીડિયા
ફૂટબોલ સુપરસ્ટાર ક્રિસ્ટિયાનો રોનાલ્ડો (Cristiano Ronaldo) અને જ્યોર્જિના રોડ્રિગ્ઝ (Georgina Rodriguez) એ પોર્ટુગલ (Portugal) માં એક ખાનગી સમારંભમાં સત્તાવાર રીતે લગ્ન કરીને પોતાના સંબંધોને એક નવું રૂપ આપ્યું છે. છેલ્લાં લગભગ એક દાયકાથી સાથે રહેતા આ દંપતીએ ગ્લેમર અને મીડિયાના ઝગમગાટથી દૂર રહીને એક અત્યંત સાદા સમારંભમાં લગ્ન કરવાની પસંદગી કરી હતી.
વૈશ્વિક ફૂટબોલ સુપરસ્ટાર ક્રિસ્ટિયાનો રોનાલ્ડોએ પોર્ટુગલના કાસ્કાઈસમાં એક સાદા સિવિલ સમારંભમાં પોતાની લૉન્ગ ટાઇમ પાર્ટનર, મોડેલ અને બિઝનેસવુમન જ્યોર્જિના રોડ્રિગ્ઝ સાથે સત્તાવાર રીતે લગ્ન (Cristiano Ronaldo marries Georgina Rodriguez) કરી લીધા છે. આ બંને એકબીજાને મળ્યાના લગભગ એક દાયકા પછી મંગળવારે, ૧૧ ઓગસ્ટે આ ખાનગી કાર્યક્રમ યોજાયો હતો.
આ સમાચારની પુષ્ટિ પોર્ટુગલના આ ફોરવર્ડ ખેલાડીનું પ્રતિનિધિત્વ કરતી પબ્લિક રિલેશન્સ ટીમ તેમજ નવપરિણિત દંપતી દ્વારા સોશિયલ મીડિયા પર શેર કરવામાં આવેલી એક સંયુક્ત પોસ્ટ દ્વારા કરવામાં આવી હતી, જેમાં તેઓએ "C❤️G" કેપ્શન સાથે પોતાની મેરેજ રિંગ્સ દર્શાવી હતી.
૪૧ વર્ષીય અલ-નાસ્ર કેપ્ટન અને ૩૨ વર્ષીય આર્જેન્ટિનિયન-સ્પેનિશ ઈન્ફ્લુઅન્સર જ્યોર્જિનાએ કોઈ ભવ્ય જાહેર આયોજનને બદલે લગ્નને ખાનગી રાખવાનો નિર્ણય કર્યો હતો. બ્રુન્સવિક ગ્રુપના સત્તાવાર પ્રતિનિધિઓ અનુસાર, લિસ્બન નજીકના દરિયાકાંઠાના શહેર કાસ્કાઈસમાં આ સમારંભ યોજાયો હતો, જેમાં માત્ર તેમના પરિવારના નજીકના સભ્યો અને તેમના પાંચ બાળકો—ક્રિસ્ટિયાનો જૂનિયર, જોડિયા બાળકો ઈવા મારિયા અને માટેઓ, અલાના માર્ટીના અને બેલા એસ્મેરાલ્ડા હાજર રહ્યા હતા. આ તારીખ આ દંપતી માટે વિશેષ મહત્વ ધરાવતી હતી, કારણ કે ૧૧ ઓગસ્ટ, ૨૦૨૫ના રોજ જ્યોર્જિનાએ એક મોટી ડાયમંડ રિંગ સાથે પોતાની સગાઈની જાહેરાત કરી હતી, જેના બરાબર એક વર્ષ બાદ બંનેએ લગ્ન કર્યા છે.
દંપતીની લવ સ્ટોરી ૨૦૧૬માં સ્પેનના મેડ્રિડમાં શરૂ થઈ હતી, જ્યાં જ્યોર્જિના ગુચી બુટીકમાં સેલ્સ આસિસ્ટન્ટ તરીકે કામ કરતી હતી. તેમના સંબંધોએ ટૂંક સમયમાં આંતરરાષ્ટ્રીય સ્તરે ધ્યાન ખેંચ્યું હતું અને જાન્યુઆરી ૨૦૧૭માં ઝ્યુરિચ ખાતે `ધ બેસ્ટ ફિફા ફૂટબોલ એવોર્ડ્સ` દરમિયાન તેઓ પ્રથમ વખત રેડ કાર્પેટ પર સાથે જોવા મળ્યા હતા. વર્ષો દરમિયાન, જ્યોર્જિનાએ રોનાલ્ડોની કારકિર્દીના વિવિધ તબક્કામાં તેનો સાથ આપ્યો અને મેડ્રિડ, તુરિન, માન્ચેસ્ટર તથા સાઉદી અરેબિયાની ક્લબ અલ-નાસ્રમાં તેના સ્થાનાંતરણ દરમિયાન તેની સાથે રહી હતી. રોનાલ્ડોની કારકિર્દીને સપોર્ટ કરવાની સાથે સાથે તેણે બ્રાન્ડ એમ્બેસેડર, મોડેલ અને પોતાની નેટફ્લિક્સ રિયાલિટી સિરીઝ `આઈ એમ જ્યોર્જિના` દ્વારા પોતાની એક અલગ ઓળખ પણ બનાવી છે.
આ સમારંભ પોર્ટુગલમાં વહેતી થયેલી એ અફવાઓ પછી યોજાયો હતો, જેમાં દાવો કરાયો હતો કે આ દંપતી મડેઇરાના ફુંચાલ કેથેડ્રલમાં લગ્ન કરવાનું છે. ૮ ઓગસ્ટે આ સેલિબ્રિટી વેડિંગ જોવા માટે કેથેડ્રલ બહાર ભીડ એકઠી થઈ ગઈ હતી, પરંતુ ત્યાં એક સ્થાનિક દંપતીના લગ્ન થઈ રહ્યા હોવાનું સામે આવ્યું હતું.
તેમના એક દાયકાના સંબંધોમાં તેમણે ઘણા કઠિન તબક્કા પણ જોયા છે. એપ્રિલ ૨૦૨૨માં પુત્રી બેલા એસ્મેરાલ્ડાના જન્મની ઉજવણી વખતે જ તેમણે તેના નવજાત જોડિયા ભાઈ એન્જલને ગુમાવ્યો હતો, જેને બંનેએ પોતાના જીવનની સૌથી દુઃખદ ક્ષણ ગણાવી હતી.
વર્ષોની મીડિયા અટકળો બાદ, આખરે આ દંપતીએ રોનાલ્ડોના દેશમાં પોતાના પરિવાર વચ્ચે પોતાના સંબંધોને સત્તાવાર કાનૂની સ્વરૂપ આપ્યું છે.
