22 October, 2025 08:53 AM IST | Mumbai | Gujarati Mid-day Correspondent
આલિયા ભટ્ટ જૂના ઘરમાં છેલ્લી દિવાળી ઊજવીને થઈ ઇમોશનલ
આલિયા ભટ્ટે પતિ રણબીર કપૂર અને દીકરી રાહા સાથે દિવાળી બહુ ધૂમધામથી સેલિબ્રેટ કરી. આ સેલિબ્રેશન પરિવાર માટે ખાસ છે, કારણ કે તેમના હાલના ઘર ‘વાસ્તુ’માં આ છેલ્લી દિવાળી છે અને થોડા સમયમાં તેઓ પાલી હિલ ખાતેના તેમના અઢીસો કરોડ રૂપિયાના નવા બંગલોમાં શિફ્ટ થઈ જશે. આ ઘરમાં દિવાળી સેલિબ્રેટ કરવાના પોતાના અનુભવ વિશે વાત કરતાં આલિયાએ કહ્યું હતું કે ‘આ ઘરમાં રાહા જન્મી હતી અને હવે અહીં અમારી છેલ્લી દિવાળી છે. આ ઘર સાથે અમારી અનેક યાદગીરી જોડાયેલી છે. આ વાસ્તવમાં ખૂબ જ ભાવુક સમય છે. રાહાને આ દિવાળી યાદ નહીં રહે, પણ આ વર્ષોની યાદો તેના હૃદયમાં વસી જશે અને આ તેના હૃદયમાં એક અનુભૂતિ છોડી જશે. દિવાળી તો બસ ભાવનાઓનું નામ છે. એ ઊષ્મા અને પ્રકાશથી ભરપૂર હોવી જોઈએ.’
આલિયાને જ્યારે તેના નવા ઘરના શિફ્ટિંગ વિશે પૂછવામાં આવ્યું તો તેણે કહ્યું કે ‘હું જીવનના આ ચૅપ્ટરને મેળવીને સાચે જ લકી અનુભવી રહી છું. અમે ઘર બદલવાની દોડધામ વચ્ચે છીએ, પણ મારું હૃદય આનંદથી ભરાયેલું છે. આ અનુભૂતિ એટલી ગહન છે કે મને લાગે છે કે એનો અસલી અનુભવ અમને ઘરમાં રહેવાના કેટલાક મહિના અથવા કદાચ એક વર્ષ પછી જ થશે.’