14 July, 2026 05:29 PM IST | Mumbai | Gujarati Mid-day Online Correspondent
આલિયા ભટ્ટની ‘તુમ્બાડ 2’માં એન્ટ્રી
બૉલિવૂડ અભિનેત્રી આલિયા ભટ્ટ હવે બહુચર્ચિત ફિલ્મ ‘તુમ્બાડ 2’નો ભાગ બની છે. ફિલ્મના નિર્માતાઓએ આલિયાના નામની સત્તાવાર જાહેરાત કરીને ફૅન્સને મોટું સરપ્રાઇઝ આપ્યું છે. આ પહેલાં નવાઝુદ્દીન સિદ્દીકી પણ આ ફિલ્મ સાથે જોડાયા હોવાની જાહેરાત થઈ હતી. હવે આલિયા અને નવાઝુદ્દીનની જોડી ‘તુમ્બાડ’ની રહસ્યમય દુનિયામાં જોવા મળશે. ‘તુમ્બાડ’ એવી ફિલ્મ છે જેણે ભારતીય સિનેમામાં લોકકથા અને ફેન્ટસી શૈલીને નવી ઓળખ આપી હતી. ફિલ્મની અનોખી સ્ટોરી, સસ્પેન્સ અને શાનદાર વિઝ્યુઅલ્સને કારણે તેને દર્શકોનો ખૂબ પ્રેમ મળ્યો હતો. રિલીઝના વર્ષો બાદ પણ ફિલ્મની લોકપ્રિયતા સતત વધી રહી છે. ફિલ્મની ફરી રિલીઝ પણ ખૂબ સફળ રહી હતી અને તેણે નવી પેઢીના દર્શકોને પણ પોતાની સાથે જોડ્યા હતા.
આલિયા ભટ્ટ પોતાની અલગ પ્રકારની ભૂમિકાઓ અને શાનદાર અભિનય માટે જાણીતી છે. તેનું ફિલ્મ સાથે જોડાવું આ પ્રૉજેક્ટને વધુ ખાસ બનાવે છે. આલિયાએ કહ્યું કે તેણે જ્યારે પહેલીવાર ‘તુમ્બાડ’ જોઈ હતી ત્યારથી આ ફિલ્મ તેમની સાથે જોડાયેલી રહી છે. તેમણે કહ્યું કે બહુ ઓછી ફિલ્મો એવી હોય છે જે પોતાની અલગ દુનિયા બનાવે અને વર્ષો સુધી લોકોના મનમાં રહે. આલિયાએ જણાવ્યું કે આ રહસ્યમય દુનિયાનો ભાગ બનવું તેના માટે ખૂબ ખાસ અનુભવ છે. તેણે સોહમ શાહ અને નવાઝુદ્દીન સિદ્દીકી સાથે કામ કરવા માટે ઉત્સાહ વ્યક્ત કર્યો હતો. ફિલ્મના અભિનેતા અને નિર્માતા સોહમ શાહે કહ્યું કે આલિયા ભટ્ટ જેવી પ્રતિભાશાળી અભિનેત્રીનું ફિલ્મ સાથે જોડાવું ખુશીની વાત છે. તેણે વિશ્વાસ વ્યક્ત કર્યો કે દર્શકોને આલિયાનું એક નવું રૂપ જોવા મળશે. નિર્માતા ડૉ. જયંતીલાલ ગડાએ પણ આલિયાના જોડાવાને ફિલ્મ માટે ખાસ ગણાવ્યું હતું. તેણે કહ્યું કે આલિયા આ ફિલ્મ માટે યોગ્ય પસંદગી છે અને દર્શકો તેમને નવા અંદાજમાં જોશે. ‘તુમ્બાડ 2’નું નિર્માણ સોહમ શાહ ફિલ્મ્સ અને પેન સ્ટુડિયોઝ સાથે મળીને કરી રહ્યા છે. ફિલ્મનું નિર્દેશન આદેશ પ્રસાદ કરી રહ્યા છે.આ ફિલ્મ 3 ડિસેમ્બર 2027ના રોજ સિનેમાઘરોમાં રિલીઝ થશે.
આલિયા ભટ્ટ હાલમાં પોતાની આગામી ફિલ્મ ‘આલ્ફા’ને લઈને ચર્ચામાં છે. આ ફિલ્મ યશ રાજ ફિલ્મ્સના સ્પાય યુનિવર્સની એક મહત્વપૂર્ણ ફિલ્મ માનવામાં આવી રહી છે. ‘આલ્ફા’માં આલિયા ભટ્ટ પહેલીવાર એક્શન અવતારમાં જોવા મળશે. ફિલ્મમાં આલિયા સાથે અભિનેત્રી શર્વરી પણ મહત્વની ભૂમિકામાં જોવા મળશે. આ ફિલ્મમાં આલિયા એક સ્પાય એજન્ટનું પાત્ર ભજવી રહી છે, જેમાં તેનો એકદમ અલગ અને દમદાર અંદાજ જોવા મળશે. ‘આલ્ફા’નું નિર્દેશન શિવ રાવૈલ કરી રહ્યા છે અને ફિલ્મને યશ રાજ ફિલ્મ્સના બેનર હેઠળ બનાવવામાં આવી રહી છે. આ ફિલ્મ સાથે આલિયા ભટ્ટ યશ રાજના લોકપ્રિય સ્પાય યુનિવર્સનો ભાગ બની રહી છે, જેમાં અગાઉ ‘ટાઈગર’, ‘વૉર’ અને ‘પઠાણ’ જેવી ફિલ્મો સામેલ રહી છે. આલિયા ભટ્ટ સતત અલગ-અલગ પ્રકારના પાત્રો પસંદ કરીને પોતાની એક અલગ ઓળખ બનાવી રહી છે. ‘ગંગુબાઈ કાઠિયાવાડી’ જેવી ગંભીર ભૂમિકા બાદ હવે ‘આલ્ફા’માં તેનો એક્શન અવતાર જોવા મળશે. બીજી તરફ ‘તુમ્બાડ 2’ જેવી રહસ્યમય ફિલ્મ સાથે જોડાયા બાદ આલિયાની આગામી ફિલ્મોની યાદી વધુ રસપ્રદ બની ગઈ છે. હવે ચાહકો આતુરતાથી રાહ જોઈ રહ્યા છે કે આલિયા ‘આલ્ફા’માં સ્પાય એજન્ટના પાત્રને કેવી રીતે જીવંત કરે છે.
