દરેક મુશ્કેલીમાં અહાન પાંડેએ મને સાથ આપ્યો છે

અવૉર્ડ-સમારંભમાં સ્ટેજ પર અનીત પડ્ડાએ સૈયારાના સહકલાકારને સૌથી સારો મિત્ર ગણાવ્યો

દિલ્હીમાં એક ન્યુઝ-ચૅનલ દ્વારા મળેલા જેન-ઝી આઇકનના અવૉર્ડ સાથે અનીત અને અહાન.

‘સૈયારા’ની સફળતાથી અહાન પાંડે અને અનીત પડ્ડા પહેલી ફિલ્મથી જ સ્ટાર્સ બની ગયાં છે. હાલમાં આ બન્નેને એક ન્યુઝ-ચૅનલ દ્વારા દિલ્હીમાં ‘જેન-ઝી આઇકન અવૉર્ડ’ આપવામાં આવ્યો હતો. અવૉર્ડ પ્રાપ્ત કર્યા બાદ અનીતે પોતાની ખુશી વ્યક્ત કરતાં અહાનની પ્રશંસા કરી હતી. અનીતે આ ફંક્શનમાં અહાનને પોતાનો સૌથી સારો મિત્ર ગણાવ્યો હતો અને એમ પણ કહી દીધું કે અહાન આ દુનિયાનો સૌથી સારો છોકરો છે.

અનીતે અવૉર્ડ સ્વીકારતી વખતે પોતાના વક્તવ્યમાં કહ્યું હતું કે ‘હું ૧૦ વર્ષની ઉંમરથી જ એક ખાસ અનુભવની શોધમાં હતી અને મને ખાતરી છે કે એ અનુભવ મને કાયમ માટે મળી ગયો છે. મારા કો-ઍક્ટર અને મારા સૌથી સારા મિત્ર અહાનનો ખૂબ આભાર. જો તે ન હોત તો કદાચ આ ફિલ્મ બની ન હોત અને હું જે બધું અનુભવી શકી એ પણ અનુભવી શકી ન હોત. સેટ પર કેટલીયે મુશ્કેલીઓ આવી હોય, પણ તેણે હંમેશાં મારો સાથ આપ્યો છે. દુનિયાના સૌથી સારા માણસોમાંના એક સાથે આ મંચ પર ઊભા રહેવાનો અનુભવ કંઈક અલગ જ છે.’

અહાન અને અનીતે એકબીજાને વળગાડ્યાં ગળે
અહાન પાંડે અને અનીત પડ્ડાએ જાહેરમાં એકબીજાને સારા મિત્ર ગણાવ્યાં હોવા છતાં ફૅન્સને એવું લાગે છે કે તેઓ ડેટિંગ કરી રહ્યાં છે. હાલમાં બન્નેનો અવૉર્ડ-ફંક્શનનો વિડિયો વાઇરલ થઈ રહ્યો છે જેમાં તેઓ ‘સૈયારા’ના ગીત પર સ્ટેજ પર ડાન્સ કરતાં જોવા મળે છે. આ ડાન્સ કરતી વખતે અહાન પહેલાં અનીતનો હાથ પકડે છે અને પછી તેને ગળે લગાવી લે છે. સ્ટેજ પરની તેમની કેમિસ્ટ્રી ફૅન્સને બહુ ગમી છે.