અનુપમ ખેરે જિમમાં પરસેવો પાડીને મસલ્સ કર્યા પ્રદર્શિત, કહ્યું... વર્કઆઉટ મારા માટે મેડિટેશન સમાન

૭૧ વર્ષના અનુપમ ખેરે જિમ વર્કઆઉટનો વિડિયો શૅર કરીને ફિટનેસ પ્રત્યેની પોતાની પ્રતિબદ્ધતા દર્શાવી છે. તેમણે વર્કઆઉટને મેડિટેશન સમાન ગણાવ્યું હતું.

અનુપમ ખેર

બૉલીવુડના દિગ્ગજ અભિનેતા અનુપમ ખેરે સોશ્યલ મીડિયા પર પોતાના જિમ વર્કઆઉટ સેશનનો એક વિડિયો શૅર કર્યો છે જેમાં તેઓ પોતાની ફિટનેસ દિનચર્યા પ્રત્યેની પ્રતિબદ્ધતા દર્શાવતા જોવા મળે છે.
ઇન્સ્ટાગ્રામ પર શૅર કરાયેલા આ વિડિયોમાં ૭૧ વર્ષના અનુપમ ખેર વજન ઊંચકીને પોતાના કોર અને બૅક (પીઠ) સ્નાયુઓને મજબૂત બનાવવાની કસરતો કરતા નજરે પડે છે. કસરત પ્રત્યેના પોતાના સતત પ્રયાસોનું પરિણામ જોઈને અનુપમ ખેરે ખુશી વ્યક્ત કરી હતી. વિડિયો સાથેની કૅપ્શનમાં તેમણે લખ્યું હતું કે ‘શરીર પર નવા-નાના મસલ્સ (સ્નાયુઓ) ઊભરતા જોવાનો આનંદ કંઈક અલગ જ હોય છે. મારે મન વર્કઆઉટ કરવું એ મેડિટેશન સમાન છે. કોઈ પણ ઉંમર કે તબક્કે આ માનવભાવનાનો એક નાનો વિજય છે.’
ફિટનેસ સંબંધિત આ પોસ્ટને આધ્યાત્મિક સ્પર્શ આપતાં અનુપમ ખેરે વિડિયોના બૅકગ્રાઉન્ડમાં શંકર મહાદેવનના કંઠે ગવાયેલું શિવતાંડવ સ્તોત્રમનું ‘જટાટવીગલજ્જલ પ્રવાહપાવિતસ્થલે’ સ્તોત્ર ઉમેર્યું હતું.