BAFTA જીત્યા બાદ `બૂંગ` મોટા પડદા પર થશે રીલીઝ, 6 માર્ચે દેશભરમાં રી-રીલીઝ

Boong Re-Release: બાફ્ટા વિજેતા પ્રથમ ભારતીય ફિલ્મ તરીકે ઇતિહાસ રચનાર ‘બૂંગ’ હવે ફરી એકવાર મોટા પડદા પર ધમાલ મચાવવા તૈયાર છે.

`બૂંગ`

બાફ્ટા વિજેતા પ્રથમ ભારતીય ફિલ્મ તરીકે ઇતિહાસ રચનાર ‘બૂંગ’ હવે ફરી એકવાર મોટા પડદા પર ધમાલ મચાવવા તૈયાર છે. Excel Entertainment, Chalkboard Entertainment અને Suitable Pictures દ્વારા નિર્મિત આ ફિલ્મ 6 માર્ચે દેશભરના સિનેમાઘરોમાં ભવ્ય રી-રિલીઝ થવા જઈ રહી છે. ફિલ્મની નવી રિલીઝ તારીખ જાહેર કરવા માટે મેકર્સે એક નવું પોસ્ટર પણ લૉન્ચ કર્યું છે.

ફિલ્મે તાજેતરમાં લંડનમાં યોજાયેલા 79મા British Academy Film Awards માં બેસ્ટ ચિલ્ડ્રન એન્ડ ફેમિલી ફિલ્મ કેટેગરીમાં એવોર્ડ જીતીને ઐતિહાસિક સિદ્ધિ મેળવી હતી. ‘બૂંગ’એ Zootopia 2, Lilo & Stitch અને Arco જેવી આંતરરાષ્ટ્રીય ફિલ્મોને પાછળ મૂકી આ પ્રતિષ્ઠિત સન્માન મેળવ્યું હતું. આ જીત વૈશ્વિક મંચ પર ભારતીય સિનેમાના ગૌરવનો ક્ષણ બની છે.

નવું પોસ્ટર શેર કરતાં મેકર્સે સોશિયલ મીડિયા પર ખાસ સંદેશ સાથે ફિલ્મની રિલીઝની જાહેરાત કરી હતી, જેને ચાહકો તરફથી ઉષ્માભર્યો પ્રતિસાદ મળ્યો છે.

ફિલ્મ ‘બૂંગ’નું લેખન અને દિગ્દર્શન Lakshmipriya Devi દ્વારા કરવામાં આવ્યું છે. ફિલ્મની વાર્તા એક નાના બાળકની આસપાસ ગોઠવાઈ છે, જે પોતાની માતાને ખાસ ભેટ આપવાનું સ્વપ્ન જુએ છે. તેની નિર્દોષ લાગણીઓમાં તે માને છે કે ગેરહાજર પિતાને પાછા ઘરે લાવવું જ તેની માતા માટે સૌથી મોટું સરપ્રાઇઝ બની શકે. પિતાની શોધમાં નીકળેલો ‘બૂંગ’ અનેક લાગણીસભર પરિસ્થિતિઓમાંથી પસાર થાય છે અને અંતે એક યાદગાર ભેટ સાથે તેની સફર પૂર્ણ થાય છે.

વર્લ્ડવાઇડ પ્રશંસા અને ભારત માટે બાફ્ટા જેવું પ્રતિષ્ઠિત સન્માન મેળવ્યા બાદ હવે ‘બૂંગ’ ફરી એકવાર મોટા પડદા પર દર્શકોને એન્ટરટેન કરવા માટે તૈયાર છે. 6 માર્ચે આ ફિલ્મ દેશભરના સિનેમાઘરોમાં રિલીઝ થશે.