25 March, 2025 06:57 AM IST | Mumbai | Gujarati Mid-day Online Correspondent
દીપિકા પાદુકોણ (ફાઇલ તસવીર)
આ વર્ષે કિરણ રાવ દિગ્દર્શિત ફિલ્મ ‘લાપતા લેડીઝ’ને ભારત તરફથી ઑસ્કર માટે ઑફિશિયલ એન્ટ્રી તરીકે મોકલવામાં આવી હતી, પરંતુ ફિલ્મ ઑસ્કર એવૉર્ડ જીતવામાં અસફળ રહી હતી. આ પહેલો પ્રસંગ નથી જ્યારે કોઈ ભારતીય ફિલ્મ ઑસ્કર સુધી પહોંચી હોવા છતાં જીત મેળવી શકી નથી. તાજેતરમાં જ જાણીતી અભિનેત્રી દીપિકા પાદુકોણે ભારતીય ફિલ્મોની હાર પર દુઃખ વ્યક્ત કર્યું અને કહ્યું કે આ પહેલીવાર નથી કે એક શાનદાર ભારતીય ફિલ્મ ઑસ્કરના રેસમાંથી બહાર થઈ છે. દીપિકા પાદુકોણે કહ્યું કે ભારતીય સિનેમા અને ભારતીય પ્રતિભાઓ સાથે વારંવાર આ પ્રકારનો અન્યાય થઈ રહ્યો છે. ભારતની ફિલ્મો અને ટેલેન્ટને ઘણીવાર નકારવામાં આવે છે, જે ખૂબ જ દુઃખદ છે.
દીપિકા પાદુકોણે ઑસ્કર વિજેતા એક્ટર અંગે શું કહ્યું?
રવિવારની સાંજે, દીપિકા પાદુકોણે પેરિસમાં લુઈ વિત્તોં શો માટે તૈયાર થતી વખતે એક ઇન્સ્ટાગ્રામ વીડિયો શૅર કર્યો હતો. આ વીડિયોમાં તેણે ઑસ્કર અંગે પોતાના વિચારો વ્યક્ત કર્યા અને 2023ના ઑસ્કર સેરેમનીમાં ‘RRR’ ના ‘નાટુ નાટુ’ ગીતની ઐતિહાસિક જીતને યાદ કરી. વીડિયોમાં દીપિકાએ કહ્યું કે આ વર્ષની ઑસ્કર વિજેતાઓમાં એક એવી વ્યક્તિ છે, જેની જીતથી તેને ખૂબ જ આનંદ થયો હતો. તે છે એડ્રિયન બ્રોડી, જેણે ‘The Brutalist’ માં પોતાના અદભૂત અભિનયથી લોકોનું દિલ જીતી બેસ્ટ એક્ટરનું એવૉર્ડ જીત્યું હતું.
‘ભારત ઑસ્કરથી વંચિત કેમ?’
દીપિકા પાદુકોણે ભારતની ઑસ્કર જીતની અભાવ અંગે પણ વાત કરી. તેણે કહ્યું, “ભારતને વારંવાર ઑસ્કરથી વંચિત કરવામાં આવ્યું છે. એક કે બે નહીં, અનેક લાયકાત ધરાવતી ફિલ્મોને નકારી કાઢવામાં આવી છે. ફિલ્મ હોય કે ટેલેન્ટ, ભારત સાથે ઘણા વખતથી અન્યાય થઈ રહ્યો છે. પણ મને યાદ છે, જ્યારે ‘RRR’ નું નામ ઑસ્કરમાં જાહેર કરવામાં આવ્યું, ત્યારે હું ખૂબ જ ભાવુક થઈ ગઈ હતી. ભારતીય હોવા ઉપરાંત તે ફિલ્મ સાથે મારું કોઈ સીધું જોડાણ ન હતું, પરંતુ તે એક ગર્વની ક્ષણ હતી. મારી માટે એ જીત ભારતીય હોવાના લીધે મહત્ત્વપૂર્ણ હતી.”
‘RRR’ ની ઐતિહાસિક જીત
2023માં ઑસ્કર સેરેમનીમાં ‘RRR’ ના ‘નાટુ નાટુ’ ગીતે ઑસ્કર જીતી ભારતીય સિનેમાને વૈશ્વિક સ્તરે ગર્વ અપાવ્યું હતું. દીપિકા પાદુકોણના વીડિયોમાં કેટલીક મહાન ભારતીય ફિલ્મોની ઝલક પણ જોવા મળી. તેમાં પાયલ કપાડિયાની ‘All We Imagine As Light’, કિરણ રાવની ‘લાપતા લેડીઝ’, રાહી અનિલ બર્વે દિગ્દર્શિત ‘તુમ્બાડ’ અને રિતેશ બત્રાની ‘The Lunchbox’ જેવી ફિલ્મો સામેલ છે. આ ફિલ્મોને વિશ્વભરમાં પ્રશંસા મળી હોવા છતાં, એક પણ ફિલ્મ ઑસ્કર માટે નામાંકિત થઈ ન હતી.