20 October, 2026 01:03 PM IST | Mumbai | Gujarati Mid-day Correspondent
સની દેઓલના જન્મદિવસે મળી ગિફ્ટ
ગઈ કાલે સની દેઓલની ૬૯મી વર્ષગાંઠ હતી. સનીએ પોતાના જન્મદિવસે ચાહકોને ખાસ ભેટ આપી છે. આ દિવસે તેની આગામી ફિલ્મ ‘સૂર્યાઃ અંત સે આરંભ તક’નું ટીઝર રિલીઝ કરવામાં આવ્યું હતું. આ ફિલ્મમાં સની મેડિકલ જગતની અંદર રહેલી ખામીઓ સામે લડતો જોવા મળશે.
ફિલ્મનું ટીઝર શૅર કરતાં સનીએ લખ્યું હતું કે ‘તેમને લાગ્યું કે આ તેનો અંત છે, પણ સૂર્યા માટે તો આ માત્ર શરૂઆત છે. જુઓ, વિચારો, સતર્ક રહો અને કંઈક ખોટું થાય તો તેની સામે લડો.’
એક મિનિટ અને ૧૭ સેકન્ડના આ ટીઝરની શરૂઆતમાં સની દેઓલ કહે છે કે ‘એક વ્યક્તિ ડૉક્ટરને ભગવાન માને છે અને પોતાના જીવનની જવાબદારી તેમના હાથમાં સોંપી દે છે. પણ જો એ જ ડૉક્ટર વિશ્વાસઘાત કરે તો તે લાચાર વ્યક્તિ શું કરે? સામાન્ય બીમારીની સારવાર માટે જતા દરદીને પાંચ લાખ રૂપિયાનું બિલ પકડાવી દેવામાં આવે છે અને પચીસ ટેસ્ટ કરાવવામાં આવે છે. ત્યાં ડૉક્ટરો પ્રિસ્ક્રિપ્શન નહીં, પણ કમિશન લખે છે. આ બધું આપણે સહન કરી રહ્યા છીએ, પણ આખરે ક્યાં સુધી?’ સનીના ચાહકોને ફિલ્મનું ટીઝર ખૂબ પસંદ આવી રહ્યું છે.
