૭૭ વર્ષની ઉંમરે નૃત્યનાટિકા દુર્ગા પર્ફોર્મ કરીને સ્ટેજ ગજવ્યું હેમા માલિનીએ

હેમા માલિનીએ શૅર કરેલી તસવીરોમાં તેઓ ભગવાન શિવની ભૂમિકા ભજવતા કલાકાર સાથે માતા પાર્વતીના રૂપમાં જોવા મળ્યાં હતાં.

હેમા માલિની

૭૭ વર્ષની ઉંમરે પણ હેમા માલિની શાસ્ત્રીય નૃત્ય પ્રત્યેના પોતાના પ્રેમને જીવંત રાખી રહ્યાં છે. તેઓ મંચ પર દૈવી કથાઓને જીવંત કરીને પ્રેક્ષકો સમક્ષ રજૂ કરે છે. અભિનેત્રી અને ભરતનાટ્યમ્ નૃત્યાંગના હેમા માલિનીએ હૈદરાબાદમાં પોતાની જાણીતી નૃત્યનાટિકા ‘દુર્ગા’ની રજૂઆત કરીને નવરાત્રિની શરૂઆતને ખાસ બનાવી હતી. આ રજૂઆતમાં માતા પાર્વતીનું રૂપ ધારણ કરીને તેમણે પોતાની કલાના માધ્યમથી દૈવી પાત્રને સાકાર કર્યું હતું. તેમણે સોશ્યલ મીડિયા પર આ ખાસ સાંજની કેટલીક ઝલક શૅર કરીને આ અનુભવને આશીર્વાદ સમાન ગણાવ્યો હતો.
હેમા માલિનીએ ૧૧ ઑક્ટોબરે ક્લાસિક કન્વેન્શન સેન્ટરમાં પોતાની લોકપ્રિય નૃત્યનાટિકા ‘દુર્ગા’ રજૂ કરી હતી. આ કાર્યક્રમ તેલંગણના અગ્રવાલ સમાજ દ્વારા આયોજિત ઉજવણીનો ભાગ હતો. આ પ્રસંગ મહારાજા અગ્રસેન જયંતી સાથે પણ સંકળાયેલો હતો.

હેમા માલિનીએ શૅર કરેલી તસવીરોમાં તેઓ ભગવાન શિવની ભૂમિકા ભજવતા કલાકાર સાથે માતા પાર્વતીના રૂપમાં જોવા મળ્યાં હતાં. આ રજૂઆત વિશે પોતાની ખુશી વ્યક્ત કરતાં હેમા માલિનીએ પોતાની લાગણી વ્યક્ત કરતાં લખ્યું હતું કે ‘ગઈ સાંજે ક્લાસિક કન્વેન્શન સેન્ટરમાં તેલંગણના અગ્રવાલ સમાજના ‘આગ્રા ડાંડિયા નવરાત્રિ’ના ઉત્સવ માટે રજૂઆત કરી હતી. ૧૧ ઑક્ટોબરે મહારાજા અગ્રસેન જયંતી પણ હતી. નવરાત્રિના પ્રથમ દિવસે મારી સૌથી લોકપ્રિય નૃત્યનાટિકા ‘દુર્ગા’ રજૂ કરવાનો અનુભવ ખૂબ જ સુંદર અને ખાસ હતો. મને ખરેખર એવું લાગ્યું કે જાણે મને આશીર્વાદ મળ્યા હોય.’