05 August, 2021 09:38 AM IST | Mumbai | Gujarati Mid-day Correspondent
‘બેલ બૉટમ’માં લારાના પાત્રને ઓળખવું મુશ્કિલ નહીં, નામુમકિન
લારા દત્તા તેની આગામી ‘બેલ બૉટમ’માં ભૂતપૂર્વ વડા પ્રધાન ઇન્દિરા ગાંધીના લુકમાં ખૂબ જ અદ્ભૂત દેખાઈ રહી છે. લોકો તેના આ લુકની ખૂબ પ્રશંસા કરી રહ્યા છે. લોકો તો ત્યાં સુધી કહી રહ્યા છે કે મેકઅપ આર્ટિસ્ટને જ નૅશનલ અવૉર્ડ આપવો જોઈએ. વાણી કપૂર અને હુમા કુરેશી પણ આ ફિલ્મમાં મહત્ત્વના રોલમાં જોવા મળશે. ૧૯ ઑગસ્ટે થિયેટર્સમાં રિલીઝ થનારી આ ફિલ્મ રિયલ સ્ટોરી પર આધારિત છે. ફિલ્મને 3D ફૉર્મેટમાં પણ રિલીઝ કરવામાં આવશે. અક્ષયકુમાર આ ફિલ્મમાં રૉ (RAW) એજન્ટના રોલમાં જોવા મળવાનો છે. ફિલ્મનું ટ્રેલર હાલમાં જ રિલીઝ કરવામાં આવ્યું છે. ટ્રેલર-લૉન્ચ દરમ્યાન લારાએ લોકોને આ ફિલ્મમાં તેના પાત્ર વિશે પૂછ્યું હતું. જોકે કોઈ એનો જવાબ આપી શક્યું નહીં. એ વિશે લારાએ કહ્યું હતું કે ‘જો કોઈ આ ફિલ્મનું મારું પાત્ર જણાવી શકે તો હું તેની આખી ફૅમિલીને થિયેટર્સમાં આ ફિલ્મ ફ્રીમાં જોવા લઈ જઈશ.’
અક્ષયકુમારે પણ અનેક સવાલો પૂછવા છતાં પણ લોકો ઓળખી ન શક્યા. એથી લારાએ કહ્યું હતું કે ‘એનો અર્થ એ કે તમે મને ટ્રેલરમાં નથી જોઈ. હું મિસિસ ઇન્દિરા ગાંધીનું પાત્ર ભજવી રહી છું. વિશ્વાસ કરો. મેકર્સે મને કહ્યું હતું કે અમે આ ફિલ્મ બનાવી રહ્યા છીએ અને ઇન્દિરા ગાંધીના રોલ માટે કાસ્ટિંગ કરી રહ્યા છીએ. આ બધી મેં સ્ક્રિપ્ટ નહોતી વાંચી એ પહેલાંની વાત છે. હા, તમે જ્યારે કોઈ મહાન હસ્તીનું પાત્ર ભજવતા હો તો તમારા પર મોટી જવાબદારી હોય છે.’