રાષ્ટ્રપતિ ભવનના ઍટ-હોમ રિસેપ્શનમાં કાર્તિક આર્યનને સ્પેશ્યલ આમંત્રણ

કાર્તિક આર્યને ‘ચંદુ ચૅમ્પિયન’માં મુરલીકાંત પેટકરની ભૂમિકા માટે બેસ્ટ ઍક્ટરનો નૅશનલ અવૉર્ડ જીત્યા બાદ રાષ્ટ્રપતિ દ્રૌપદી મુર્મુના આમંત્રણથી રાષ્ટ્રપતિ ભવનના ‘ઍટ-હોમ’ રિસેપ્શનમાં હાજરી આપી હતી.

કાર્તિક આર્યન

કાર્તિક આર્યને શનિવારે નવી દિલ્હીના રાષ્ટ્રપતિ ભવનમાં રાષ્ટ્રપતિ દ્રૌપદી મુર્મુ દ્વારા આયોજિત ‘ઍટ-હોમ’ રિસેપ્શનમાં ભાગ લીધો હતો. આ કાર્યક્રમની શરૂઆત ‘વંદે માતરમ્’ અને રાષ્ટ્રગાનના ગાન સાથે થઈ હતી. આ પરંપરાગત કાર્યક્રમમાં અલગ-અલગ ક્ષેત્રોની જાણીતી હસ્તીઓ સામેલ થાય છે. એમાં રાજનેતાઓ, સેનાના સભ્યો, ખેલાડીઓ, કલાકારો અને વિવિધ ક્ષેત્રોમાં નોંધપાત્ર સિદ્ધિ મેળવનારા લોકોનો સમાવેશ થાય છે અને આ વખતે એમાં કાર્તિક આર્યનને રાષ્ટ્રપતિ દ્વારા આયોજિત આ ખાસ રિસેપ્શન માટે આમંત્રણ આપવામાં આવ્યું હતું. કાર્તિકને આ આમંત્રણ ‘ચંદુ ચૅમ્પિયન’માં પૅરાલિમ્પિક્સ ગોલ્ડ મેડલ વિજેતા મુરલીકાંત પેટકરની ભૂમિકા ભજવીને ‘બેસ્ટ ઍક્ટર’નો નૅશનલ અવૉર્ડ જીતવા બદલ મળ્યું હતું.