02 June, 2026 01:54 PM IST | Mumbai | Gujarati Mid-day Online Correspondent
લલિત મોદી અને સુષ્મિતા સેનના ડેટિંગ એરાની ફાઇલ તસવીર
બોલિવૂડ (Bollywood)ની સૌથી પ્રતિભાશાળી અભિનેત્રીઓમાંની એક સુષ્મિતા સેન (Sushmita Sen) તેની અંગત જિંદગીને લઈને અવારનવાર ચર્ચામાં રહે છે. અભિનેત્રીએ હજી સુધી લગ્ન કર્યા નથી, પરંતુ તેના અગાઉ કેટલાક અફેર્સ રહ્યા છે. આ અગાઉ તેના સંબંધો જાણીતા ઉદ્યોગપતિ અને આઈપીએલ (IPL)ના પૂર્વ ચેરમેન લલિત મોદી (Sushmita Sen) સાથે પણ હતા. જો કે, બાદમાં આ બંનેનું બ્રેકઅપ થઈ ગયું હતું. હવે લલિત મોદીએ સુષ્મિતા સેન સાથેના પોતાના સંબંધોની વાત સ્વીકારી છે અને આ સાથે જ તેમનો આ સંબંધ આખરે કેમ તૂટ્યો તે અંગે પણ મોટો ખુલાસો કર્યો છે. લલિત મોદીએ આ અંગે વાત કરતા એવો પણ દાવો કર્યો છે કે, તેઓ અભિનેત્રીના ખર્ચે જીવતા બોયફ્રેન્ડ હતા.
થોડા વર્ષો પહેલાં, અભિનેત્રી સુષ્મિતા સેન અને જાણીતા ઉદ્યોગપતિ લલિત મોદીની કેટલીક તસવીરો સોશિયલ મીડિયા (Social Media) પર જોરદાર વાયરલ થઈ હતી. આ ફોટોગ્રાફ્સમાં બંને એકબીજા સાથે રોમેન્ટિક પળો વિતાવતા અને વેકેશન માણી રહેલા જોવા મળ્યા હતા. આ વાયરલ થયેલી તસવીરોમાંની એક ખાસ તસવીરમાં સુષ્મિતા સેનના હાથમાં એક મોટી ડાયમંડ રિંગ જોવા મળી હતી. આ ફોટો સામે આવ્યા બાદ સોશિયલ મીડિયા પર લોકોએ સુષ્મિતા સેનને નિશાન બનાવવાનું શરૂ કર્યું હતું અને ઘણા યુઝર્સે તેને પૈસા પાછળ ભાગનારી એટલે કે `ગોલ્ડ ડિગર` કહીને ટ્રોલ કરી હતી. જો કે, આ તમામ વિવાદો અને ટ્રોલિંગ વચ્ચે પણ અભિનેત્રીએ ખૂબ જ મક્કમતાથી પોતાનો પક્ષ રાખ્યો હતો. આખરે, લલિત મોદીએ પોતાના સંબંધો અને અભિનેત્રીને `ગોલ્ડ ડિગર` કહેવા વિશે ખુલ્લેઆમ (Lalit Modi defends Sushmita Sen against `gold-digger` tag) વાત કરી છે.
‘હ્યુમન્સ ઓફ બોમ્બે’ ને આપેલા એક ઇન્ટરવ્યુમાં લલિત મોદીએ સુષ્મિતા સેનની આર્થિક સ્વતંત્રતા વિશે ખુલીને વાત કરી છે. તેણે સુષ્મિતાને `ગોલ્ડ ડિગર` કહેનારા લોકોને જડબાતોડ જવાબ આપતાં તેની સ્વનિર્ભરતાના ભરપૂર વખાણ કર્યા છે.
લલિત મોદીએ જણાવ્યું કે, ‘સુષ્મિતા એક અત્યંત સુંદર, સફળ અને પોતાના દમ પર આગળ આવેલી મહિલા છે. સાચું કહું તો, મારા ઓળખીતાઓમાં કદાચ જ કોઈ એવી વ્યક્તિ હશે જેની પાસે સુષ્મિતા કરતાં વધુ હીરા (ડાયમંડ્સ) હોય. તેણે આ બધું જ પોતાની મહેનતથી કમાયું છે, એટલું જ નહીં, તેના પોતાના હીરાના સ્ટોર્સ પણ હતા. લોકો તેને લાલચી કહી રહ્યા હતા, જે તદ્દન ખોટું હતું.’
ભૂતકાળના દિવસો યાદ કરતાં વધુમાં ઉમેર્યું કે, ‘તેણે આ બધું પોતાના દમ પર હાંસલ કર્યું છે. એવું ક્યારેય નથી બન્યું કે હું સુષ્મિતા સાથે બહાર ગયો હોઉં અને મારે કોઈ વસ્તુનું પેમેન્ટ કરવું પડ્યું હોય. દરેક વસ્તુનું પેમેન્ટ તેણે પોતે જ કર્યું છે. હું એક રીતે તેના ખર્ચે જીવતો (પલનારો) બોયફ્રેન્ડ હતો. સુષ્મિતા એક ખુદદાર અને સ્વાભિમાની મહિલા છે, અને આ વાત હું ખૂબ જ ગર્વ અને ખુશી સાથે કહી રહ્યો છું. તે એક અસાધારણ અને સેલ્ફ-મેડ લેડી છે, જે ક્યારેય કોઈની પાસેથી કંઈ જ નહીં લે.’
અભિનેત્રી સુષ્મિતા સેન અને ઉદ્યોગપતિ લલિત મોદી વચ્ચેના સંબંધો એક સમયે ભારે ચર્ચામાં રહ્યા હતા. જો કે, બાદમાં બંને અલગ થઈ ગયા હતા. ઇન્ટરવ્યુમાં લલિત મોદીએ સુષ્મિતા સેનને પોતાના જીવનની સૌથી મહત્વપૂર્ણ વ્યક્તિઓમાંથી એક ગણાવી છે અને તેમના બ્રેકઅપ પાછળનું અસલી કારણ જાહેર કર્યું છે.
લંડન (London)માં સ્થાયી થયેલા ઉદ્યોગપતિ લલિત મોદીના જણાવ્યા અનુસાર, તેમની વચ્ચે કોઈ ડ્રામેટિક બ્રેકઅપ થયું નહોતું. પરંતુ, સમય જતાં બંનેની જિંદગી અલગ-અલગ દિશામાં આગળ વધી ગઈ હતી. સુષ્મિતા સેન ભારત (India) સ્થાયી થઈ ગઈ હતી જ્યારે તેઓ પોતે લંડનમાં રહેતા હતા, અને આ ભૌગોલિક અંતર જ તેમના સંબંધો તૂટવાનું મુખ્ય કારણ બન્યું હતું.
પોતાના સંબંધોના દિવસોને યાદ કરતાં લલિત મોદીએ જણાવ્યું કે, ‘સુષ્મિતા મારા માટે ખૂબ જ ખાસ વ્યક્તિ હતી. તેણે મને ઘણી બાબતોમાં પરિપક્વ થવામાં મદદ કરી હતી. તે સમયે તે મારા જીવનનો એક અત્યંત મહત્વનો હિસ્સો હતી અને આગળ પણ રહી હોત, પરંતુ અમારી વચ્ચેનું અંતર ખૂબ વધારે હતું. તેનું કરિયર ભારતમાં હતું અને મારું જીવન લંડનમાં. આમ છતાં, અમારો સંબંધ ઘણો ખાસ હતો અને તેની મીઠી યાદો આજે પણ મારા દિલમાં છે. તે આજે પણ મારી ખૂબ સારી મિત્ર છે અને હું હંમેશા તેના સારા ભવિષ્યની કામના કરું છું. તે એક અદ્ભુત મહિલા છે અને તેણે પોતાની બંને દીકરીઓ રેની અને અલીશા માટે જે કંઈ કર્યું છે તે ખરેખર પ્રશંસનીય છે.’
તેણે સુષ્મિતા સેનની પ્રશંસા કરતા વધુમાં ઉમેર્યું કે, ‘સુષ્મિતાના માતા-પિતા પણ ખૂબ જ ખાસ વ્યક્તિઓ છે. એક સિંગલ મધર હોવા છતાં તેણે પોતાના જીવનમાં ઘણી મોટી સિદ્ધિઓ હાંસલ કરી છે. તે જે રીતે જીવનમાં સતત પ્રગતિ કરી રહી છે, તે જોઈને હું આશ્ચર્યચકિત થઈ જાઉં છું. મારી તમામ શુભેચ્છાઓ હંમેશા તેની સાથે છે.’
અભિનેત્રી સુષ્મિતા સેન અને ઉદ્યોગપતિ લલિત મોદીના સંબંધોની વાત જ્યારે પહેલીવાર સામે આવી, ત્યારે આખી દુનિયા ચોંકી ગઈ હતી. આ સંબંધ પહેલીવાર જુલાઈ ૨૦૨૨માં સત્તાવાર રીતે જાહેર થયો હતો, જ્યારે લલિત મોદીએ પોતે સોશિયલ મીડિયા પર સુષ્મિતા સેન સાથે વિતાવેલ વેકેશનની કેટલીક તસવીરો શેર કરી હતી. આ ફોટોગ્રાફ્સ ઇન્ટરનેટ પર જોરદાર વાયરલ થયા હતા અને ઘણા દિવસો સુધી ગુગલ ટ્રેન્ડ્સમાં ટોપ પર રહ્યા હતા. સોશિયલ મીડિયા યુઝર્સ આ અનએક્સપેક્ટેડ જોડીને જોઈને આશ્ચર્યચકિત હતા અને તેમના સંબંધોને લઈને જાતભાતની અટકળો અને ચર્ચાઓ શરૂ થઈ ગઈ હતી.
તાજેતરમાં આપેલા એક ઇન્ટરવ્યુમાં લલિત મોદીએ ખુલાસો કર્યો છે કે, જ્યારે તે સોશિયલ મીડિયા પર આ તસવીરો શેર કરી રહ્યા હતા ત્યારે સુષ્મિતા સેન આ વાતથી બિલકુલ વાકેફ હતી અને તેને આ સામે કોઈ વાંધો નહોતો. ફોટો પોસ્ટ કર્યા પછી પણ તેણે ક્યારેય તે ડિલીટ કરવા માટે કહ્યું નહોતું.
આ કિસ્સાને યાદ કરતાં લલિત મોદીએ જણાવ્યું કે, ‘મેં આ બધું તેની સામે જ કર્યું હતું. જો કે, તેને અંદાજો નહોતો કે હું ખરેખર આવું કંઈક કરી બેસીશ. અમે પ્લેનમાં કોઈ વાત પર ચર્ચા કરી રહ્યા હતા. ત્યારે મેં તેને કહ્યું, `તને ખબર છે, હું આ ફોટોઝ પોસ્ટ કરવા જઈ રહ્યો છું`. આ સાંભળીને તે મજાકમાં `હા હા હા` કરીને હસવા લાગી અને મેં પોસ્ટનું બટન દબાવી દીધું. અમે તે સમયે સાર્દિનિયામાં હતા અને તે પોતાની માતાને મળવા લંડન પાછી જઈ રહી હતી. હું તેને મૂકવા માટે પ્લેનમાં સાથે જઈ રહ્યો હતો. અમે પ્લેનમાંથી નીચે ઉતર્યા ત્યાં સુધીમાં તો સોશિયલ મીડિયા પર હોબાળો મચી ગયો હતો. પરંતુ કોઈ વાંધો નહીં, તેમાં કંઈ ખોટું નહોતું. સુષ્મિતાએ આ બાબતે મને કંઈ જ નહોતું કહ્યું, અરે `આ ફોટો હટાવી દો` એવું પણ નહોતું કીધું.’
