૨૦૦ કરોડના કેસમાં જૅકલિન ફર્નાન્ડીઝે પાછી ખેંચી અરજી; સુપ્રીમ કોર્ટ તરફથી મળી રાહત

Money Laundering Case: બોલિવૂડ અભિનેત્રી જૅકલિન ફર્નાન્ડીઝે સુપ્રીમ કોર્ટમાંથી અરજી પાછી ખેંચી; એક્ટ્રેસે ૨૦૦ કરોડના મની લોન્ડ્રિંગ કેસમાં દિલ્હી હાઈકોર્ટના આદેશને સુપ્રીમ કોર્ટમાં આપ્યો હતો પડકાર; જાણો સમગ્ર મામલો

જૅકલિન ફર્નાન્ડિસની ફાઇલ તસવીર

બોલિવૂડ અભિનેત્રી જૅકલિન ફર્નાન્ડીઝ (Jacqueline Fernandez)એ આજે સર્વોચ્ચ અદાલત (Supreme Court)માંથી પોતાની તે અરજી પાછી ખેંચી લીધી છે, જેમાં તેમણે ૨૦૦ કરોડ રૂપિયાના મની લોન્ડ્રિંગ કેસ (Money Laundering Case)માં પોતાની વિરુદ્ધ આરોપો નક્કી કરવાના દિલ્હી હાઈકોર્ટ (Delhi High Court)ના આદેશને પડકાર્યો હતો. તેમણે આ મામલે સુપ્રીમ કોર્ટમાં અરજી દાખલ કરી હતી.

દિલ્હી હાઈકોર્ટના એક આદેશ વિરુદ્ધ જૅકલિન ફર્નાન્ડીઝે સુપ્રીમ કોર્ટમાં અરજી દાખલ કરી હતી. તેણે દિલ્હી હાઈકોર્ટના એ આદેશને પડકાર્યો હતો, જેના હેઠળ તેના પર મની લોન્ડ્રિંગ કેસમાં આરોપો નક્કી થવાના હતા. હવે સુપ્રીમ કોર્ટ તરફથી જૅકલિન ફર્નાન્ડીઝને આ જ અરજી પાછી ખેંચવાની મંજૂરી મળી ગઈ છે.

જૅકલિનને અરજી પાછી ખેંચવાની મળી પરવાનગી

અહેવાલ મુજબ, જૅકલિને પોતાની અરજીમાં દિલ્હી હાઈકોર્ટના એક આદેશને પડકાર્યો હતો. વાસ્તવમાં, દિલ્હી હાઈકોર્ટે પોતાના આદેશમાં ઠગ સુકેશ ચંદ્રશેખર (Sukesh Chandrasekhar) સાથે જોડાયેલા રૂ. ૨૦૦ કરોડના મની લોન્ડ્રિંગ કેસમાં એક ચુકાદો આપ્યો હતો. જૅકલિન પણ આ જ કેસ સાથે જોડાયેલી છે. દિલ્હી હાઈકોર્ટે એન્ફોર્સમેન્ટ ડિરેક્ટોરેટ (Enforcement Directorate)ની પ્રાસિક્યુશન ફરિયાદ (અભિયોજન ફરિયાદ)ને રદ કરવાનો અને ટ્રાયલ કોર્ટ દ્વારા જૅકલિન પર નક્કી કરાયેલા આરોપોના ચુકાદાને બદલવાનો ઇનકાર કરી દીધો હતો.

પરંતુ ગુરુવારે સુનાવણી દરમિયાન જૅકલિને સુપ્રીમ કોર્ટ પાસે પોતાની અરજી પાછી ખેંચવાની પરવાનગી માંગી હતી. સર્વોચ્ચ અદાલતે તેમની આ વિનંતીને સ્વીકારી લીધી અને તેમને અરજી પાછી ખેંચવાની મંજૂરી આપી દીધી. સુપ્રીમ કોર્ટના જસ્ટિસ બી.વી. નાગરત્ના અને જસ્ટિસ જોયમાલ્ય બાગચીની બેંચે સુનાવણી દરમિયાન જૅકલિનને અરજી પાછી ખેંચવાની મંજૂરી આપી હતી.

એક્ટ્રેસ પોતાને નિર્દોષ ગણાવી ચૂકી છે

જૅકલિને અગાઉ મની લોન્ડ્રિંગ કેસમાં દિલ્હીની એક અદાલત સમક્ષ પોતાને નિર્દોષ ગણાવી હતી અને કેસનો સામનો કરવાની ઈચ્છા વ્યક્ત કરી હતી. ૩ જૂનના રોજ પટિયાલા હાઉસ કોર્ટમાં હાજર થવા પર પણ જૅકલિને પોતાના પર લગાવવામાં આવેલા આરોપોનો ઇનકાર કર્યો હતો. આ સાથે જ તેમણે આ મામલાને ગુણવત્તાના આધારે લડવાનો નિર્ણય કર્યો હતો.

ઠગ ચંદ્રશેખર અને ૧૪ અન્ય લોકો સામે આરોપો નક્કી

ટ્રાયલ કોર્ટે કથિત ઠગ ચંદ્રશેખર, તેની પત્ની લીના મારિયા પૉલ અને અન્ય ૧૪ લોકો સામે પણ મની લોન્ડ્રિંગના આરોપો નક્કી કર્યા છે. આ તમામ લોકોએ પોતાને નિર્દોષ ગણાવ્યા છે અને ટ્રાયલની માંગ કરી છે. આ મામલો અત્યારે ૧૬ જુલાઈના રોજ આગળની કાર્યવાહી માટે ટ્રાયલ કોર્ટમાં લિસ્ટ કરવામાં આવ્યો છે.

આ અપડેટ જૅકલિન દ્વારા આ જ કેસમાં સરકારી ગવાહ (અપ્રૂવર) બનવાની પોતાની અરજી પાછી ખેંચવાના થોડા અઠવાડિયા બાદ સામે આવ્યું છે. ઈડીએ આ અરજીનો વિરોધ કરતા કહ્યું હતું કે તપાસ દરમિયાન જૅકલિનનું વર્તન સંતોષજનક નહોતું.

તપાસ એજન્સીએ અભિનેત્રી પર લગાવ્યા ગંભીર આરોપો

એન્ટી-મની લોન્ડ્રિંગ એજન્સીનો આરોપ છે કે જૅકલિનને ચંદ્રશેખરના ગુનાહિત બેકગ્રાઉન્ડ વિશે ખબર હતી, તેમ છતાં તે તેના સંપર્કમાં રહી હતી. તપાસ એજન્સીના જણાવ્યા અનુસાર, ચંદ્રશેખરે કથિત મની લોન્ડ્રિંગ પ્રવૃત્તિઓમાંથી મેળવેલી ગુનાહિત કમાણીનો ઉપયોગ કરીને જૅકલિન માટે લક્ઝરી ગિફ્ટ્સ, કિંમતી સામાન અને અન્ય સુવિધાઓ પૂરી પાડી હતી.

ઈડીએ જૅકલિન પર ચંદ્રશેખર પાસેથી અંદાજે રૂ. ૭ કરોડની લક્ઝરી ગિફ્ટ્સ લેવાનો પણ આરોપ લગાવ્યો છે. જો કે, અભિનેત્રીનું હંમેશાં એવું જ કહેવું રહ્યું છે કે તેને ચંદ્રશેખરની કથિત ગુનાહિત પ્રવૃત્તિઓ અથવા તે ભેટસોગાદો માટે ઉપયોગમાં લેવાયેલા નાણાંના સ્ત્રોત વિશે કોઈ માહિતી નહોતી.

મની લોન્ડ્રિંગનો આ મામલો એવા આરોપો સાથે જોડાયેલો છે જેમાં કહેવામાં આવ્યું છે કે ચંદ્રશેખરે રેનબેક્સીના ભૂતપૂર્વ પ્રમોટર્સ શિવિન્દર સિંહ અને મલવિન્દર સિંહની પત્નીઓ સાથે અંદાજે રૂ. ૨૦૦ કરોડની છેતરપિંડી કરી હતી.