30 November, 2025 08:52 AM IST | Mumbai | Gujarati Mid-day Correspondent
ગઈ કાલે ગોવામાં રજનીકાન્તને મુખ્ય પ્રધાન પ્રમોદ સાવંતના હસ્તે લાઇફટાઇમ અચીવમેન્ટ અવૉર્ડ આપવામાં આવ્યો હતો. રણવીર સિંહે ઘૂંટણિયે બેસીને રજનીકાન્તને અભિનંદન આપ્યાં હતાં.
રજનીકાન્તે ફિલ્મ-ઇન્ડસ્ટ્રીમાં ૫૦ વર્ષ પૂર્ણ કર્યાં છે. આ ખાસ અવસરે તેમને ગોવામાં યોજાયેલા ૫૬મા ઇન્ટરનૅશનલ ફિલ્મ ફેસ્ટિવલ ઑફ ઇન્ડિયા (IFFI) ખાતે સન્માનિત કરવામાં આવ્યા હતા. ફેસ્ટિવલની ક્લોઝિંગ સેરેમનીમાં રજનીકાન્તને લાઇફટાઇમ અચીવમેન્ટ અવૉર્ડ આપવામાં આવ્યો હતો. આ અવૉર્ડ મેળવીને ૭૪ વર્ષના રજનીકાન્ત ભાવુક બની ગયા હતા અને એ સમયે પ્રસંગમાં હાજર વ્યક્તિઓએ તેમને સ્ટૅન્ડિંગ ઓવેશન આપ્યું હતું.
આ અવૉર્ડ સ્વીકારવા માટે સ્ટેજ પર પહોંચીને રજનીકાન્તે કહ્યું હતું કે ૧૦૦ વર્ષ પછી પણ હું ઍક્ટર તરીકે જ જન્મ લેવા માગું છું. તેમણે પોતાની સ્પીચમાં કહ્યું હતું કે ભારતીય સિનેમામાં પાંચ દાયકાની સફર... જાણે થોડાં જ વર્ષોમાં પસાર થઈ ગઈ હોય એવું લાગે છે. આ ફંક્શનમાં રજનીકાન્તને ગોવાના મુખ્ય પ્રધાન પ્રમોદ સાવંતે શાલ અને મેમેન્ટો આપીને સન્માનિત કર્યા હતા.
આ સન્માન મળતાં રજનીકાન્તે કહ્યું હતું કે ‘હું ખૂબ જ નમ્રતા અને કૃતજ્ઞતાની લાગણી અનુભવું છું અને ૫૦ વર્ષના મારા કામને બિરદાવવા અને સન્માનિત કરવા બદલ દેશની સરકારનો હૃદયપૂર્વક આભાર માનું છું. જો હું પાછળ ફરીને જોઉં તો લાગે છે કે મેં માત્ર ૧૦-૧૫ વર્ષ કામ કર્યું છે અને એનું કારણ ફક્ત સિનેમા અને અભિનય પ્રત્યેનો મારો પ્રેમ છે. એથી ૧૦૦ વર્ષ પછી પણ હું ફરીથી ઍક્ટર એટલે કે રજનીકાન્ત તરીકે જન્મ લેવા માગું છું. તમારા પ્રેમ અને સ્નેહ બદલ આભાર.’
ફિલ્મ ફેસ્ટિવલ દરમ્યાન રજનીકાન્તની તાજેતરમાં રિલીઝ થયેલી ફિલ્મ ‘લાલ સલામ’ પણ દર્શકો માટે સ્ક્રીન કરવામાં આવી હતી. રજનીકાન્તની દીકરી ઐશ્વર્યા રજનીકાન્તના ડિરેક્શન હેઠળ બનેલી આ ફિલ્મ ૨૦૨૪માં રિલીઝ થઈ હતી. આ ફિલ્મના સ્ક્રીનિંગ દરમ્યાન ઐશ્વર્યા પણ હાજર હતી.
દિવંગત દિગ્ગજોને આપવામાં આવી શ્રદ્ધાંજલિ
શુક્રવારે ૫૬મા ઇન્ટરનૅશનલ ફિલ્મ ફેસ્ટિવલ ઑફ ઇન્ડિયાનું ગોવામાં સમાપન થયું હતું. ૯ દિવસ સુધી ચાલેલા આ ફેસ્ટિવલમાં દુનિયાભરના ઘણા ફિલ્મમેકર્સ અને કલાકારોએ ભાગ લીધો હતો. આ સમાપન-કાર્યક્રમમાં આ વર્ષે ફિલ્મજગતના દિવંગત દિગ્ગજોને શ્રદ્ધાંજલિ આપવામાં આવી હતી. ‘ઇન ફૉન્ડ રિમેમ્બરન્સ ઑફ ધ આર્ટિસ્ટ્સ વી લૉસ્ટ’ શીર્ષક હેઠળ આયોજિત આ પ્રસ્તુતિમાં ધર્મેન્દ્ર, કામિની કૌશલ, સુલક્ષણા પંડિત, સતીશ શાહ, પીયૂષ પાંડે, ઝુબીન ગર્ગ અને શ્યામ બેનેગલને યાદ કરવામાં આવ્યા હતા.