રક્ષાબંધને ક્રિતી સૅનનના એક તીરે બે નિશાન! બહેનને રાખડી બાંધી, ટ્રોલર્સને આપ્યો જડબાતોડ જવાબ

Raksha Bandhan 2026: અભિનેત્રી ક્રિતી સૅનને તેની બહેન નુપુર ક્રિતી સૅનન સાથેની એક ખાસ પોસ્ટમાં પોતાના રક્ષાબંધન આઉટફિટ અંગે ચાલી રહેલા વિવાદ પર રમૂજી કટાક્ષ કર્યો છે, બહેન નુપુરના કાંડે રાખડી બાંધીને ઉજવ્યો તહેવાર

તસવીર સૌજન્યઃ સોશ્યલ મીડિયા

બોલિવૂડ અભિનેત્રી ક્રિતી સૅનન (Kriti Sanon) રક્ષાબંધન (Raksha Bandhan 2026) પર તેના આઉટફિટ અંગે ચાલી રહેલી ચર્ચા વચ્ચે શાંત રહેવાના મૂડમાં નથી. તેણે આ સમગ્ર વિવાદનો ખૂબ જ રમૂજી અને સણસણતો જવાબ આપ્યો છે. તેની જ્વેલરી બ્રાન્ડની જાહેરાતને (Kriti Sanon Raksha Bandhan ad controversy) લઈને સોશિયલ મીડિયા (Social Media) પર શરૂ થયેલા વિવાદના દિવસો બાદ, ક્રિતી સૅનને તેની બહેન નુપુર સેનન (Nupur Sanon) સાથે રક્ષાબંધનની એક સુંદર પોસ્ટ શેર કરીને આ વિવાદ પર કટાક્ષ કર્યો છે.

ક્રિતી સૅનને બહેન સાથે ઉજવી રક્ષાબંધન

ક્રિતી સૅનન અને તેની બહેન નુપુર સૅનન એકબીજાને રાખડી બાંધતા હોય તેવો એક ક્લોઝ-અપ ફોટો શેર કર્યો હતો. આ તસવીર સાથે લખેલા કેપ્શને તમામ લોકોનું ધ્યાન ખેંચ્યું હતું.

તેણે કેપ્શનમાં લખ્યું હતું કે, "જ્યારે ‘રાખી ફેશન કમિટી’ હજી પણ ચર્ચામાં વ્યસ્ત છે, ત્યારે અમે ખરેખર જે બાબત મહત્વની છે તેના પર ધ્યાન કેન્દ્રિત કરી રહ્યા છીએ. આપ સૌને રક્ષાબંધનની શુભકામનાઓ."

આઉટફિટ વિવાદ પર ક્રિતી સૅનનનું નિવેદન

આ કટાક્ષ ક્રિતી સૅનનની તાજેતરની વિવાદાસ્પદ જાહેરાત અને તેના ઈન્ડો-વેસ્ટર્ન ફેસ્ટિવ લુક સામે થયેલી ટીકાઓનો પ્લેફુલ જવાબ માનવામાં આવે છે. તાજેતરમાં એક જ્વેલરી બ્રાન્ડના રક્ષાબંધન કેમ્પેઈનમાં ક્રિતી સૅનનના બ્રાલેટ-સ્ટાઈલ બ્લાઉઝ અને ડ્રેપ્ડ સ્કર્ટ પર સોશિયલ મીડિયા યુઝર્સે વિરોધ દર્શાવ્યો હતો. ભારે ટ્રોલિંગ બાદ બ્રાન્ડ દ્વારા તે જાહેરાત પાછી ખેંચી લેવામાં આવી હતી.

જોકે, ક્રિતી સૅનને પોતે પહેરેલા કપડાંનો બચાવ કર્યો હતો અને મહિલાના સંસ્કૃતિ પ્રત્યેના આદરને કપડાંથી માપવા સામે સવાલ ઉઠાવ્યા હતા. તેણે લખ્યું હતું કે, "તહેવારોનો સાર તમે પહેરેલા કપડાંમાં નથી, પરંતુ પરંપરાઓ સાથે જોડાયેલી લાગણીઓ અને ભાવનાઓમાં રહેલો છે."

બહેન નુપુર સાથે ઉજવણીની ખાસ ક્ષણ

વિવાદોથી દૂર, આ પોસ્ટ ક્રિતી સૅનન અને નુપુર સેનન વચ્ચેના ગાઢ પ્રેમની એક ઝલક પૂરી પાડે છે. બંને બહેનોએ એકબીજાને રાખડી બાંધીને આ તહેવારની ઉજવણી કરી હતી.

ક્રિતી સૅનને અગાઉ પણ શેર કર્યું હતું કે, તે અને નુપુર એકબીજાને રાખડી બાંધે છે કારણ કે તેઓ જાણે છે કે ભાઈની જેમ જ તેઓ પણ એકબીજાનું રક્ષણ કરી શકે છે. આ વિવાદ વચ્ચે નુપુરે પણ ક્રિતી સૅનનનું સમર્થન કર્યું હતું. ક્રિતી સૅનનએ આ એક જ વિટી કેપ્શન દ્વારા સોશિયલ મીડિયાના ઘોંઘાટને હાસ્યમાં ઉડાવીને આગળ વધવાનો સંદેશ આપ્યો છે.

ક્રિતી સૅનનનું વર્કફ્રન્ટ

ક્રિતી સૅનનના વર્ક ફ્રન્ટની વાત કરીએ તો, તે તાજેતરમાં હોમી અદાજણિયા દ્વારા નિર્દેશિત ફિલ્મ `કોકટેલ ૨` માં શાહિદ કપૂર અને રશ્મિકા મંદાના સાથે જોવા મળી હતી. આ રોમેન્ટિક કોમેડી-ડ્રામા ફિલ્મ જૂન ૨૦૨૬માં થિયેટરોમાં રિલીઝ થઈ હતી અને તાજેતરમાં જ તે ઓટીટી (OTT) પ્લેટફોર્મ પર સ્ટ્રીમ થઈ છે.

આ પહેલાં કૃતિ નવેમ્બર ૨૦૨૫માં રિલીઝ થયેલી આનંદ એલ. રાયની ફિલ્મ `તેરે ઈશ્ક મેં` માં ધનુષ સાથે મુખ્ય ભૂમિકામાં જોવા મળી હતી. આ સિવાય અભિનેત્રી પાસે આગામી સમયમાં ઘણા મોટા પ્રોજેક્ટ્સ છે, જેમાં તે `નો એન્ટ્રી` ની સિક્વલ અને ફિલ્મ નિર્માતા રાહુલ ધોળકિયાના એક પ્રોજેક્ટ સાથે જોડાયેલી હોવાના અહેવાલો છે.