15 April, 2026 10:21 AM IST | Mumbai | Gujarati Mid-day Correspondent
બાદશાહ
પંજાબી રૅપર બાદશાહનું ચર્ચિત ગીત ‘ટટીરી’ હવે નવા રૂપમાં ફરી રિલીઝ થયું છે. પહેલાં ‘ટટીરી’ ગીતને લઈને મોટો વિવાદ ઊભો થયો હતો. મહિલાઓ વિશે અપમાનજનક શબ્દો અને સરકારી સ્કૂલના યુનિફૉર્મ તથા બસનો પરવાનગી વગર ઉપયોગ કરવાના કારણે હરિયાણા રાજ્ય મહિલા આયોગે કાર્યવાહી કરી હતી. આ મામલે બાદશાહ સામે પોલીસ-ફરિયાદ પણ નોંધાઈ હતી અને તેને માફી પણ માગવી પડી હતી.
‘ટટીરી ફિર સે’ નામથી રજૂ થયેલા આ ગીતમાં અગાઉના વિવાદો બાદ લિરિક્સમાં ફેરફાર કરવામાં આવ્યા છે અને એને યોગ્ય અંદાજમાં રજૂ કરવામાં આવ્યા છે. આ નવા વર્ઝનમાં હરિયાણાની સંસ્કૃતિ અને આધુનિક હિપ-હૉપનું અનોખું મિશ્રણ જોવા મળે છે.
બાદશાહે આ નવા વર્ઝનને સંસ્કૃતિ, શક્તિ અને સ્વૅગનું મિશ્રણ ગણાવ્યું છે. તેણે કહ્યું કે આ માત્ર એક ગીત નથી, પરંતુ એક ખાસ અનુભવ છે. જોકે ગીતમાં મોટા ફેરફારો કરવામાં આવ્યા નથી, પરંતુ એ ભાગને હટાવી દેવામાં આવ્યો છે જેમાં મહિલાઓ વિશે અપશબ્દો હતા. આ સિવાય ગીતનાં વિઝ્યુઅલ્સમાં પણ બદલાવ કરવામાં આવ્યાં છે. પહેલા વર્ઝનમાં સ્કૂલ-ડ્રેસમાં ડાન્સ કરતી છોકરીઓ અને બસ હતી, પણ હવે એ સીન દૂર કરવામાં આવ્યા છે અને એની જગ્યાએ હરિયાણાના વડીલોનો સ્વૅગ અને ગીતને સ્થાનિક સ્પર્શ આપતી ડાન્સ-ક્લિપ્સ ઉમેરવામાં આવી છે.
