10 January, 2022 12:50 PM IST | Mumbai | Gujarati Mid-day Correspondent
મહેશ બાબુ, ભાઈ રમેશ બાબુ
મહેશ બાબુના મોટા ભાઈ રમેશ બાબુનું ૫૬ની ઉંમરે લાંબી માંદગી બાદ અવસાન થયું છે. રમેશ બાબુએ ૧૨ વર્ષની ઉંમરે ઍક્ટિંગ શરૂ કરી દીધી હતી. તેમણે ‘બાઝાર રાઉડી’ જેવી ફિલ્મમાં યાદગાર પર્ફોર્મન્સ આપ્યો હતો. બાદમાં તેમણે ફિલ્મો પ્રોડ્યુસ કરવાનું શરૂ કર્યું હતું. તેમના નિધનના સમાચાર મળતાં જ અનેક લોકો શોક વ્યક્ત કરી રહ્યા છે. મહેશ બાબુને કોવિડ થયો છે. તે ક્વૉરન્ટીન છે. એવામાં તેના માટે ભાઈના નિધનના સમાચાર વધુ દુઃખદાયક છે. ભાઈનો ફોટો ઇન્સ્ટાગ્રામ પર શૅર કરીને મહેશ બાબુએ કૅપ્શન આપી હતી ‘તમે મારી પ્રેરણા રહ્યા છો. તમે મારી સ્ટ્રેંગ્થ રહ્યા છો. તમે મારી હિમ્મત રહ્યા છો. તમે મારું સર્વસ્વ રહ્યા છો. જો તમે ન હોત તો હું આજે જે છું એનો અડધો ભાગ પણ ન હોત. તમે મારા માટે જે પણ કર્યું છે એના માટે આભાર. હવે આરામ કરો. તમે હંમેશાં મારા ‘અન્ના’ રહેશો. હંમેશાં તમને પ્રેમ કરતો રહીશ.’
તો બીજી તરફ શોક વ્યક્ત કરતા ટ્વિટર પર ચિરંજીવીએ ટ્વીટ કર્યું હતું ‘શ્રી જી. રમેશ બાબુના નિધન વિશે સાંભળીને દુઃખ અને આંચકો લાગ્યો છે. શ્રી ક્રિષ્ના ગારુ અને મહેશ બાબુ અને તેમના પરિવારને સંકટની આ ઘડીમાં ઈશ્વર સામર્થ્ય આપે.’