હવે આવ્યાં ડાર્ક સર્કલ દૂર કરવા માટેનાં ઇન્જેક્શન

આંખોની નીચેનાં કાળાં કૂંડાળાંને દૂર કરવા માટે તમે ઘરગથ્થુ ઉપાયો, આઇ ક્રીમ અને અન્ડર આઇ પૅચિસ બધું જ ટ્રાય કરીને જોઈ લીધું હોય અને તેમ છતાં જો કોઈ ફરક લાગતો ન હોય તો તમે કાર્બોક્સિથેરપીનો વિકલ્પ અજમાવી શકો છો

પ્રતીકાત્મક તસવીર

તમારી જીવનશૈલી ખૂબ તનાવયુક્ત હોય, નીંદર પૂરી થતી ન હોય અને સ્ક્રીન ટાઇમ અને પ્રદૂષણને કારણે આંખોની નીચે કાળાં કૂંડાળાં હોય તો એ ખૂબ સામાન્ય સમસ્યા બની ચૂકી છે. કેટલાક લોકો આઇ ક્રીમ્સ, ઘરગથ્થુ ઉપાય અને અન્ડ આઇ પૅચિસનો ઉપયોગ કરે છે, પણ એ વધુ અસરકારક હોતાં નથી. એવામાં એક નવો કૉસ્મેટિક ટ્રેન્ડ ઝડપથી લોકપ્રિય થઈ રહ્યો છે.

કાર્બનડાયૉક્સાઇડ ઇન્જેક્શન્સ, જેને મેડિકલની ભાષામાં કાર્બોક્સિથેરપી કહેવામાં આવે છે. ભારતમાં પણ આ ટ્રીટમેન્ટ ડિમાન્ડમાં છે કારણ કે ડાર્ક સર્કલ દૂર કરવામાં એને ખૂબ પ્રભાવશાળી માનવામાં આવે છે.

કાર્બોક્સિથેરપી એક કૉસ્મે​ટિક પ્રોસીજર છે જેમાં મેડિકલ ગ્રેડ કાર્બનડાયૉક્સાઇડ ગૅસને સ્કિનની નીચે ઇન્જેક્ટ કરવામાં આવે છે. જેવો કાર્બનડાયૉક્સાઇડ ટિશ્યુમાં જાય છે, બૉડી એ એરિયામાં વધુ ઑક્સિજન અને બ્લડ સપ્લાય મોકલવા લાગે છે. આ નૅચરલ રિસ્પૉન્સથી બ્લડ-સર્ક્યુલેશન સુધરે છે, કોલૅજનનું પ્રોડક્શન વધે છે, સ્કિન વધારે ટાઇટ અને હેલ્ધી દેખાય છે. આંખોની નીચેની ત્વચા ખૂબ પાતળી હોય છે ત્યાં આ ટ્રીટમેન્ટ બ્લડ ફ્લો વધારવામાં મદદ કરે છે, જેનાથી ડાર્ક સર્કલ ઝાંખાં પડવા લાગે છે.

ભારતીય ત્વચામાં સ્વાભાવિક રૂપથી મેલૅનિન વધુ હોય છે. એ જ કારણે આંખો‌ની નીચે કાળા ઘેરા બનવાની સમસ્યા વધુ દેખાય છે. કાર્બોક્સિ ટ્રીટમેન્ટ સીધી એ કારણો પર અસર નાખે છે જેમ કે નબળું બ્લડ-સર્ક્યુલેશન, પાતળી થતી સ્કિન અને લિમ્ફેટિક કન્જેશન (તરલના જમાવની સમસ્યા). આ ઉપચાર બધી સમસ્યાના કારણોને સુધારીને આંખોની નીચેની ત્વચાને તાજગી અને ચમક આપે છે.

આ ટ્રીટમેન્ટમાં કેટલો સમય લાગે અને અંદાજિત ખર્ચ કેટલો થાય એની વાત કરીએ તો એક સેશન ૧૫થી ૩૦ મિનિટનું હોય છે અને એમાં વધારે દુખાવો થતો નથી. સામાન્ય રીતે ૪-૮ સેશનની જરૂર પડતી હોય છે. જો કાળાં કૂંડાળાં વધુ હોય તો વધારે સેશનની પણ જરૂર પડી શકે. દરેક સેશન વચ્ચે એક-બે અઠવાડિયાંનો ગૅપ હોય છે. એક સેશનની ફી બેથી પાંચ હજાર થાય છે. આ ફી પણ એરિયાવાઇઝ અને ડર્મેટોલૉજિસ્ટના એક્સ્પીરિયન્સ મુજબ ઓછી-વધુ હોઈ શકે.