સાડી સાથે બ્લાઉઝને બદલે શૉર્ટ કુરતીનો ટ્રેન્ડ

ઇન્સ્ટાગ્રામ પર ફૅબ્રિક, કટ અને લેયરિંગના પ્રયોગો સાથે શૉર્ટ કુરતી અને સાડીનું ફ્યુઝન વાઇરલ થઈ રહ્યું છે ત્યારે આ નવો ટ્રેન્ડ અપનાવતી વખતે કઈ ટેક્નિકલ અને સ્ટાઇલિંગ બાબતોનું ધ્યાન રાખવું જરૂરી છે એ જાણી લો

સાડી સાથે શૉર્ટ કુરતીનો ટ્રેન્ડ

સોશ્યલ મીડિયા અને ખાસ કરીને ઇન્સ્ટાગ્રામ પર આજકાલ ટ્રેડિશનલવેઅર સાથે અવનવા પ્રયોગો કરવાનો ટ્રેન્ડ ખૂબ લોકપ્રિય થઈ રહ્યો છે. સાડી સાથે કન્વેન્શનલ કે પરંપરાગત બ્લાઉઝ પહેરવાને બદલે શૉર્ટ કુરતી પેર કરવાનો કન્સેપ્ટ યુવતીઓમાં ખૂબ પસંદ કરવામાં આવી રહ્યો છે. આ લુક માત્ર ફૅશનેબલ કે એલિગન્ટ દેખાય છે એવું નથી, પરંતુ એ અત્યંત આરામદાયક અને ફંક્શનલ પણ છે. જોકે આ ફ્યુઝન સ્ટાઇલને યોગ્ય રીતે કૅરી ન કરવામાં આવે તો આખો લુક મેસી કે અસંતુલિત દેખાઈ શકે છે. આ ટ્રેન્ડને પ્રૉપર્લી ફૉલો કરવા માટે ફૅબ્રિકની પસંદગી, ફિટિંગ અને ઍક્સેસરાઇઝિંગ વિશે વિગતવાર જાણવું જરૂરી છે.

કુરતીની લંબાઈ

સાડી સાથે શૉર્ટ કુરતી સ્ટાઇલ કરતી વખતે સૌથી મહત્ત્વની બાબત કુરતીની લંબાઈ છે. કુરતી બહુ લાંબી ન હોવી જોઈએ. સામાન્ય રીતે કમરથી થોડી નીચે અથવા હિપ્સના ઉપલા ભાગ સુધી આવતી કુરતી આ લુક માટે સૌથી શ્રેષ્ઠ ગણાય છે. જો કુરતી વધારે લાંબી હશે તો સાડીની પ્લીટ્સ ઢંકાઈ જશે અને સાડીનો મૂળ આકાર જળવાશે નહીં. આ ઉપરાંત સાઇડ સ્લિટ ધરાવતી કુરતી પસંદ કરવી જેથી સાડીનો પલ્લુ ડ્રેપ કરતી વખતે અને પ્લીટ્સ બનાવતી વખતે કમ્ફર્ટ જળવાઈ રહે.

ફૅબ્રિકનું કૉમ્બિનેશન

સાડી અને કુરતી બન્નેના ફૅબ્રિક વચ્ચે વિઝ્યુઅલ બૅલૅન્સ હોવું જરૂરી છે. જો સાડી એકદમ લાઇટવેઇટ હોય - જેમ કે શિફોન, જ્યૉર્જેટ કે ઑર્ગન્ઝા - તો એની સાથે સહેજ સ્ટ્રક્ચર્ડ ફૅબ્રિકની કુરતી જેમ કે કૉટન, ચંદેરી કે સિલ્ક સારી લાગે છે. જો તમે ભારે બનારસી કે સિલ્કની સાડી પહેરી રહ્યા હો તો કુરતી સિમ્પલ અને પ્લેન રાખવી જોઈએ જેથી આખો લુક વધારે પડતો ઓવરલોડેડ ન લાગે.

પલ્લુ ડ્રેપિંગ

શૉર્ટ કુરતી સાથે સાડી પહેરતી વખતે પલ્લુ કઈ રીતે લેવો એ આખા લુકનો આધાર નક્કી કરે છે. પલ્લુને પિન કર્યા વગર ખુલ્લો ખભા પર રાખો. આ સ્ટાઇલ રૉયલ અને કૅઝ્યુઅલ બન્ને લુક આપે છે. આ ઉપરાંત સાડીના પલ્લુને કુરતી પરથી વ્યવસ્થિત સેટ કરીને કમર પર એક મૅચિંગ કે સ્ટેટમેન્ટ કમરપટ્ટો બાંધવો. આનાથી વેસ્ટ લાઇન હાઇલાઇટ થાય છે અને આધુનિક લુક મળે છે. પલ્લુને ગળાની આસપાસ સ્કાફની જેમ લપેટીને પણ ટ્રેન્ડી લુક મેળવી શકાય છે.

નેકલાઇન અને સ્લીવ્ઝ

કુરતીની નેકલાઇન સાડીના લુકને વધારે છે. બોટ-નેક, વી-નેક, ચાઇનીઝ કૉલર કે અંગરખા પૅટર્ન સાડી સાથે ખૂબ સુંદર ઉઠાવ આપે છે. જો કુરતી પર હેવી વર્ક હોય તો ગળામાં જ્વેલરી પહેરવાનું ટાળવું અને માત્ર સ્ટેટમેન્ટ ઇઅર-રિંગ્સ પહેરવાં. સ્લીવ્ઝની બાબતમાં થ્રી-ફોર્થ કે એલ્બો-લેન્થ સ્લીવ્ઝ આ ફ્યુઝન લુકમાં વધુ સોબર અને ગ્રેસફુલ દેખાય છે.

કલર બ્લૉકિંગ અનેપ્રિન્ટ્સનો સમન્વય

જો તમે એક જ કલરટોન એટલે કે મોનોક્રોમેટિક રાખવા માગતા હો તો સાડી અને કુરતી એક જ કલર ફૅમિલીનાં પસંદ કરી શકો છો જે ઊંચાઈનો આભાસ આપે છે, પણ જો કૉન્ટ્રાસ્ટ લુક જોઈતો હોય તો કલર બ્લૉકિંગ ટેક્નિકનો ઉપયોગ કરવો. દાખલા તરીકે પ્લેન રૉયલ બ્લુ કુરતી સાથે મસ્ટર્ડ યલો સાડી અથવા પેસ્ટલ પિન્ક કુરતી સાથે ઑફ-વાઇટ સાડી ખૂબ ઉઠાવ આપે છે. જો સાડી પ્રિન્ટેડ હોય તો કુરતી પ્લેન રાખવી અને જો સાડી પ્લેન હોય તો પ્રિન્ટેડ કે એમ્બ્રૉઇડરીવાળી શૉર્ટ કુરતી પસંદ કરવી.

ઍક્સેસરીઝ અને ફુટવેઅર

ઑક્સિડાઇઝ્ડ સિલ્વર જ્વેલરી, સ્ટેટમેન્ટ રિંગ્સ અથવા બોલ્ડ ઝૂમખા આ લુક સાથે પર્ફેક્ટ મૅચ થાય છે. ફુટવેઅરમાં મોજડી, કોલ્હાપુરી ચંપલ કે બ્લૉક હીલ્સ આ આઉટફિટને સંપૂર્ણ ગ્રેસ આપે છે. શૉર્ટ કુરતી અને સાડીનું કૉમ્બિનેશન પરંપરા અને આધુનિકતાનો સુંદર સંગમ છે. ઇન્સ્ટાગ્રામ પર જોઈને આ ટ્રેન્ડ ટ્રાય કરતી વખતે તમારા બૉડી-ટાઇપ અને પર્સનલ કમ્ફર્ટને ધ્યાનમાં રાખીને ઉપર જણાવેલી બાબતોનું પાલન કરશો તો તમે કોઈ પણ પ્રસંગે ભીડથી અલગ અને સ્ટાઇલિશ દેખાઈ શકશો.