26 March, 2026 01:13 PM IST | Mumbai | Gujarati Mid-day Correspondent
પ્રતીકાત્મક તસવીર
અત્યારે ઉનાળાની રજાઓની સીઝન જામી છે. હિલ સ્ટેશન વેકેશન, બીચ વેકેશન, ઍડ્વેન્ચર વેકેશન પર જવાનું પ્લાનિંગ થઈ રહ્યું હશે. પરંતુ મુસાફરી દરમિયાન બદલાતું હવામાન, ધૂળ, પ્રદૂષણ અને સૂર્યનો આકરો તાપ તમારી ત્વચાને નુકસાન પહોંચાડી શકે છે. અચાનક થતા ફેરફારોને કારણે ત્વચા નિસ્તેજ બની જાય છે અથવા ખીલ અને ટૅનિંગ જેવી સમસ્યાઓ સર્જાય છે. જો તમે પણ આ વેકેશનમાં ક્યાંક બહાર જવાનું વિચારી રહ્યા હો તો આ મિનિમમ સ્કિન-કૅર ગાઇડ તમારા કામમાં આવશે.
ઉનાળામાં સૂર્યનાં હાનિકારક UV કિરણો ખૂબ જ શક્તિશાળી હોય છે. પછી ભલે તમે હિલ સ્ટેશન પર હો કે બીચ પર, સનસ્ક્રીન અનિવાર્ય છે. ઓછામાં ઓછું SPF 50વાળું સનસ્ક્રીન પસંદ કરો જે બ્રૉડ સ્પેક્ટ્રમ હોય. યાદ રાખો, સનસ્ક્રીન માત્ર એક વાર લગાવી દેવાથી ચાલતું નથી. જો તમે સતત બહાર ફરતા હો તો દર ૩ કલાકે એને ફરીથી લગાવવું જરૂરી છે.
મુસાફરી દરમિયાન આપણે ઘણી વાર પાણી પીવાનું ભૂલી જઈએ છીએ. ડીહાઇડ્રેશનની અસર સૌથી પહેલાં ચહેરા પર દેખાય છે. દિવસમાં ઓછામાં ઓછું ૩-૪ લીટર પાણી પીઓ. આ ઉપરાંત તમારી કિટમાં ફેસ મિસ્ટ અથવા ગુલાબજળ રાખો. જ્યારે પણ થાક લાગે અથવા ચહેરો ડ્રાય લાગે ત્યારે એના સ્પ્રેથી ત્વચાને તરત જ હાઇડ્રેશન અને તાજગી મળશે.
ટ્રાવેલિંગ દરમિયાન ચહેરા પર ધૂળના થર જામી જાય છે. રાત્રે સૂતાં પહેલાં ચહેરાને કોઈ સારા જેન્ટલ ક્લેન્ઝરથી સાફ કરવાનું ક્યારેય ન ભૂલો. ત્યાર બાદ હળવું હાઇડ્રેટિંગ મૉઇશ્ચરાઇઝર લગાવો. જો તમે ઠંડા પ્રદેશમાં જઈ રહ્યા હો તો ત્વચા ફાટે નહીં એ માટે થોડું હેવી મૉઇશ્ચરાઇઝર વાપરવું હિતાવહ છે.
આપણે ઘણી વાર હોઠની સંભાળ લેવાનું ભૂલી જઈએ છીએ. તડકા અને પવનને કારણે હોઠ જલદી સુકાઈ જાય છે તેથી SPFવાળું લિપ બામ સાથે રાખો. એવી જ રીતે આંખોને સુરક્ષિત રાખવા માટે હાઈ ક્વૉલિટી સનગ્લાસિસ પહેરો.
ટ્રાવેલિંગમાં બહુ બધી પ્રોડક્ટ્સ લઈ જવાની જરૂર નથી. માત્ર જરૂરી વસ્તુઓ જેમ કે ફેસવૉશ, સનસ્ક્રીન, મૉઇશ્ચરાઇઝર અને લિપ બામની નાની ટ્રાવેલ સાઇઝ બૉટલ્સ રાખો. ભારે મેકઅપ કરવાનું ટાળો જેથી તમારી ત્વચા મુક્તપણે શ્વાસ લઈ શકે.
